الآثار الجانبية للحياة الزوجية

بما إني هاسافر قريب على مصر الحبيبة لقضاء الأجازة السنوية ومش هكون موجود في فترة العيد والشهر اللي بعديه، فحبيت أعيد عليكم من دلوقت، وأقولكم كل سنة وانتو طيبين وربنا يجعل كل أيامكم أفراح وأعياد. والبوست ده بقى حبيت أنزل فيه بعض الكلمات الساخرة الجميلة اللي جتلي بالإيميل، يعني مش أنا اللي كاتبها أو مؤلفها. وكل سنة وانتو طيبين مرة تاني ونلتقي على خير انشاء الله في شهر نوفمبر القادم.

نزلت في يوم الصيدلية

أسأل عن علاج للعزوبية

وصفولي الحياة الزوجية

ونصحوني قبل ما أخده أقرا النشرة الداخلية

قلت مش مهم بس أقضي على اسمها ايه دية

وفعلا دخلت قفص الحياة الرومانسية

حب ودلع وأهم من ده كله مابقيتش لوحدية

وفي كل مناسبة نجيب لبعض هدية

ونختلف لكن نتناقش ونوصل للحل بصورة ودية

ونجيب عيلين يبقو عزوة ويملو علينا البيت شوية

عظيم خفيت من العيا وعايشة حياة هنية

نتفسح ونخرج وكله مية مية

وتيجي خناقة، زي الموجة بسرعة تروح معدية

ونقول دي من توابل الحياة الأساسية

وتمر مشكلة بسيطة كدة، أمور شكلية

مش مهم مين غلطان دي مش مواضيع جوهرية

طالما القصد خير، فإنما الأعمال بالنية

***

هي مالها الحياة كده بقت عادية؟

والمعارك كترت كدة لية، كانت فين مستخبية؟

قومي اكوي لي القميص يا ولية

الله؟ مش ده اللي قبل كدة كان بيقول يا نور عنية؟

بص كويس في دولابك حتلاقى قمصانك كلها مغسولة ومكوية

هبلت في الرد أنا باين علية

مش مهم حأرد بطريقة أحسن المرة اللى جاية

ايه اللي أنا حاسة بية ده ايه اللي بيجرا فية؟

وصبحت في يوم الصبحية

لقيت الدنيا بتلف بية

ومش قادرة تشيلني رجلية

وضغطي تلتمية وعشرين على تلتمية

على شوية آلام معدية

قلت أقرا الآثار السلبية

العلاج كله جوانب ايجابية

إلا أن القولون حيبقى دايما في حالة عصبية

وقد يحدث تضخم في الغدة الدمعية

وانتفاخ في الجفون الفوقانية

يصاحبه اكتئاب في الحالة النفسية

وتورم في الأحبال الصوتية

وتقلبات في الحالة المزاجية

وتغيرات شكلية

يا إما سمنة يا إما نحافة مرضية

شراهة أو فقدان شهية

تخمة من الاختلافات الفكرية

حموضة واضطرابات في القناة الهضمية

أنيميا وسوء ﺗﻐﺬية

بدل الحديد، بلع زلط وقنابل نووية

على نسيان شوية مشاعر ضرورية

وارتجاج في الأوضاع الدماغية

طول اليوم أعمال منزلية

بيت وولاد وتربية

أعباء وتحمل مسؤولية

تصل لآلام روماتزمية

وأوجاع في السلسلة الفقرية

زعيق وخناق وحاجات جنونية

تأخر في القوى العقلية

نشاط في في جهاز المناعة اللي بقى دايما في حالة دفاعيةضد الحروب البكتيرية

تصلب في الشرايين الهيامية

وانقباض في المشاعر القلبية

إمساك عن الكلمات الاعتذارية

اسهال في الشتائم المؤﺫية

توطن الأمراض النكدية

التحول من حالة طيبة لحالة مفترية

فتق من كتر العنادية

انفجار في الزايدة الدودية

قصور في الوظيفه الكلامية

زيادة افراز هرمون العبودية

برد ونزلات شعبية

من كتر الأمطار الرعدية

وقد تشتكي من حساسية

وجيوب أنفية

وقلة حيلة وضعف شخصية

وصداع على شوية كبت حرية

وحبة أمراض مزمنة مستعصية

تدهور عام في الحالة الصحية

ولتخفيف ﻫذه الآثار يرجى شرب مياه معدنية

وأكل الكثير من الخضروات الورقية

وقريت ملحوظة تحت اللآثار الجانبية

يجب المواظبة على العقار والاستمرارية

لكل اللي عاوزين الحياة الاسرية

فقد اثبتت الابحاث العلمية

أنه الوحيد من بين الأدوية

اللي يقدر يقضي على الحالة اياها بمنتهى الفاعلية

وأنا اللي كنت فاكرة الحياة جميلة وردية

ياريتني سمعت كلامهم يوم ما كنت في الصيدلية

طرائف رمضانية

أنعم به من صيام!!
الإنسان على ما جُبل عليه، وهذا ما حدث فعلا لأحد الشباب، حيث قرّر أن يصوم يوماً تطوّعاً في الصيف، فأمسك عن الطعام والشراب بطبيعة الحال، وما لبث أن غابت قضية الصيام عن ذهنه، فلما أتى وقت الغداء تناول وجبة دسمة من الأرز واللحم وغير ذلك من أطايب الطعام، كل ذلك وهو ناسٍ أنّه صائم، بل إنه أتبع طعامه بالكثير من الفواكه الطازجة، وبعد انتهائه من غدائه الدسم تذكّر أنه صائم، ثم ذهب إلى صلاة العصر، ونسي مرة أخرى أنه صائم، فشرب كوبين من الشاي الثقيل، ثم تذكر مرة أخرى أنه صائم، ولا يزال هذا الشاب يتساءل حتى يومنا هذا: يا ترى، هل صيامي صحيح ؟! .

****

غزل عفيف!!
يقول زين القضاة السكندري في القطائف:

لله در قطائف محشوة.. شبهتها لما بدت في صحنها
من فستق دعت النواظر واليدا... بحقاق عاج قد حشين زبرجدا

ويقول الشاعر سد الدين بن عربي في القطائف والكنافة:

وقطائف مقرونة بكنافة.. هاتيك تطربني بنظم رائق
من فوقهن السكر المذرور.. ويروقني من هذه المنثور

ويقول الشاعر الليبي عبد ربة الغاني في ذكر حلوى رمضان:

الليل فيك مؤرخ بضيائه.. هذي زلابية وتلك كنافة
ضخب وزينات وعز مقام.... وحلاوة من كل صنف شام

***

البخلاء والصوم

دخل شاعر على رجل بخيل فامتقع وجه البخيل وظهر عليه القلق والاضطراب، ووضع في نفسه إن أكل الشاعر من طعامه فإنه سيهجوه .. غير أن الشاعر انتبه إلى ما أصاب الرجل فترفق بحاله ولم يطعم من طعامه .. ومضى عنه وهو يقول:

تغير إذ دخلت عليه حتى .. .. فطنت .. فقلت في عرض المقال

عليَّ اليوم نذر من صيام .. .. فاشرق وجهه مثل الهلال

ومن الأشعار الجميلة التي قيلت في ذم البخلاء الصائمين قول الشاعر:

أتيت عمرًا سحرًا .. .. فقال: إني صائمٌ

فقلت: إني قاعدٌ .. .. فقال: إني قائمٌ

فقلت: آتيك غدًا .. .. فقال: صومي دائمٌ

ومن ذلك ما قال أبو نواس يهجو الفضل قائلاً:

رأيت الفضل مكتئبًا .. .. يناغي الخبز والسمكا

فأسبل دمعة لما .. .. رآني قادمًا وبكى

فلما أن حلفت له .. .. بأني صائم ضحكا

منقوول www.islamweb.net

أخيرا أخدت الرخصة

أخييييييييييراً تجاوزت كل الاختبارات والامتحانات وحصلت على رخصة السواقة.. بعد 8 شهور تدريب واختبارات.. وبعد مصاريف وصلت لـ 10 آلاف جنية مصري، أخدت الرخصة...لولولولولولولييييي.. الحمد لله مش كان فيه أي خطأ في الامتحان الأخير لدرجة ان الشرطي قالي مبرووك قبل ما أوقف العربية في الباركن.. علشان الناس اللي شمتت المرة اللي فاتت لما سقطت في امتحان الباركن والرويس تسكت خالص..ههههههههه

دلوقت بقى هندخل في مشكلة تانية بس صغيرة شوية، وهي اختيار العربية اللي هتتشرف إني أسوقها.. طبعا هي اللي هتتشرف مش أنا حتى لو كانت هامر أو أودي أو لكزس أو انفينتي أو بي إم إكس 6.. بس للأسف مفيش هنا في الإمارات عربيات نصر ولا لادا ولا حتى فيات 128...مش مشكلة أكيييد هلاقي عربيات بنفس المستوى...هههههه... المهم دلوقت ان الرخصة في جيبي.

يااااااااااه الواحد حاسس دلوقت ان هم كبير انزاح.. أصل انتو مش تعرفوا مدى الصعوبة في ان الواحد ياخد رخصة هنا.. فيه ناس دخلت الامتحان 10 مرات.. وفيه واحد أعرفه دخل الامتحان 32 مرة.. وفيه واحد قعد عشر سنيين لحد ما أخد الرخصة.. بس الحمد لله من تاني محاولة ربنا وفقني وخلصت من الحكاية دي.. وبصراحة أنا فرحت كتييير قوي.. ومش مبالغة لو قلت اني فرحت بالنجاح في امتحان السواقة وبالرخصة أكتر من فرحتي بنتيجة الثانوية العامة رغم اني طلعت التالت على المحافظة بتاعتي.. وأكتر من نتيجة البكالريوس رغم ان تقديري كان جيد جدا مع مرتبة الشرف.. الحمد لله.

إيه رأيكم، أنا بفكر أشتري هامر وأدوس كل العربيات الصغيرة في الشارع قدامي..ههههههه.. ولا أقولكم أستورد توك توك من الهند علشان مفيش منه هنا.. وأبقى أنا صاحب أول توك توك.. اختاروا انتو بقى وقولولي رأيكم.. أجيب هامر ولا توك توك.. ولا أجيب بطوطة زي بتاعة آبي وأنافسها..هههههههه

كل سنة وانتو كلكلم طيبين بمناسبة حلول شهر رمضان المبارك أعاده الله عليكم بالخير واليمن والبركات

احترم نفسك

أكيد كلنا سمعنا عن حملة احترم نفسك اللي بتحاول تواجه ظاهرة قبيحة بدأت تستفحل في مصر وهي ظاهرة التحرش الجنسي، اللي بقت عاملة زي السرطان الخبيث اللي انتشر في المجتمع كله للأسف. وبصراحة كنت بتوقع ان الكلام في الموضوع ده بيتم تضخيمه، لكني اتصدمت لما قريت خبر في الصحف عن استطلاع عمله المركز المصري لحقوق المرأة اتذكر فيه إن نسبة 98% من النساء الاجنبيات اللي زاروا مصر، و83% من المصريات تعرضوا للتحرش الجنسي، لكن الأخطر من النسبة دي، ان ٦٢% من الرجال المصريين اعترفوا بأنهم بيتحرشو بالنساء. يعني مش بس قلة أدب لا وبجاحة كمان؟!!.

الغريبة ان نسبة كبيرة من الشباب والبنات كمان بيقولو ان السبب في انتشار الظاهرة القبيحة دي هو لبس وسلوك البنات، وسمعنا عن حملة جديدة اسمها احترمي نفسك، طيب ازاي نفسر تعرض البنات المحجبات للتحرش، ده فيه حتى بنات منقبات قالوا انهم تعرضوا لنفس الاهانة دي. وياريت الامر يقتصر على الشباب والبنات، ده حتى الاطفال الصغيرين بقم هما كمان مشكلة. كنت بتفرج مرة على برنامج 90 دقيقة وكان فيه طالبة في الثانوية بتتصل بتحكي مشكلة، المشكلة ايه بقى، ان باب مدرستهم ،(ثانوية بنات) قدام باب مدرسة ابتدائي بنين، والبابين بيتفتحو مع بعض، والعيال بتوع ابتدائي بيضايقوا البنات ويتحرشوا بيهم باللمس بطريقة وحشة.. طب هم الاطفال دول عارفين معنا الحاجات اللي بيعملوها..

فيه مشكلة أخلاق بجد.. والخوف ان المشكلة تزيد عن حدها في المستقبل، يعني لما الاطفال الصغيرين دول يكبروا هنتوقع منهم ايه؟؟ اذا كانوا وهما صغيرين بيعملوا كدة.. امال لما يكبرو يعملوا ايه؟؟؟ وبعدين هو الواحد ممكن يأمن ازاي على اخته أو بنته أو مراته انها تنزل الشارع أو تروح المدرسة او الجامعة او الشغل؟؟؟ بالتأكيد الامور مش سيئة جدا.. ولسة فيه قدر من الأمان.. لكنه للأسف بيقل كل يوم عن اللي قبله.

اعتقد ان المطلوب مش نعمل حملات ونطالب الناس انها تحترم نفسها.. المطلوب ان يكون فيه قانون رادع يحاكم اي حد يقوم بأي فعل من افعال التحرش.. انتو فاكرين يعني ان الاوروبيين ناس محترمين.. بالتأكيد لا بس فيه قانون والناس كلها بتحترمه لان مخالفته هتعرض اي واحد للعقاب.. المطلوب حملة لإصدار قانون يجرم ظاهرة التحرش.. المطلوب ان الامن يتحرك في الشارع ويحمي الناس كلها مش البنات بس ويكون مصدر أمان للناس مش مصدر خوف.. مش كفاية ابدا نطالب الناس انها تحترم نفسها.. لانها مش هتحترم نفسها ابدا ما دام مفيش قانون ممكن يعاقبها ومادام مفيش أمن بيردعها..

تاج جديد

التاج ده جالي هدية من الفنانة الدكتور نعكشة، وهي فنانة لأن رسوماتها تجنن ودكتورة لانها في كلية طب ربنا ينجحها ياارب، وعلشان مش اكون ممل هابدأ على طول لأني عارف ان الموضوعات دي بتبقى تقيلة على ناس كتير.

بدأت تدون من امتي ؟ و دخلت العالم ده ازاي ؟

أنا بدأت التدوين في فبراير 2008، يعني من فترة صغيرة، ودخلته ازاي دي قصة طويلة بس بشكل مختصر كنت بتصفح النت والمدونات واستفزني جدا بوست كانت كاتباه شيرين صاحبة مدونة أيامنا الحلوة..هههههههههههههه.. وكنت عايز أعلق عليه، مش هاقول طبعا هو ايه لأنها هي عارفة، وبعدين عملت المدونة علشان تكون موقع ثابت ليا أعلق من عليه أو أكتب فيه اللي أنا عاوزة. وبالمناسبة أنا بكتب مقالات سياسية لكني قررت من البداية ان مش أنشر أي مقال منها على المدونة أو أتكلم عن أي حاجة تخص الشغل.

ايه كان انطباعك في البداية ؟

والله هي أي حاجة بتكون في أولها ممتمعة لكنها بتتحول مع الوفت لنوع من الملل أو العبء، لكنها مهمة في التعبير عن بعض الآراء الشخصية والتواصل مع الناس الآخرين.

مين أكتر واحد بتهتم بتعليقه علي بوستك الجديد ؟

أي حد بيكتب تعليق لازم أهتم بيه، ولو مش بهتم مش هاضيف التعليقات أصلا.. وعلى رأي جملة قريتها في مدونة همس الحياة.. المدونة من غير تعليقات زي الصحراء. بس ده ما يمنعش ان فيه تعليقات معينة بتهمني شوية، منها مثلا سنووايت وآبي ونعكشة وبندقة واجدع بنوتة وايامنا الحلوة وعاشقة الجنة ودواير ونودي الزملكاوية ودينا واسراء حامد وعاشقة النقاب وغيرهم كتيير.. بشكل عام اي حد بيعلق ليه كل الاحترام والتقدير والاهتمام.

ايه أهم حاجة اتعلمتها من عالم التدوين ؟

بصراحة.. ولا حاجة،ههههههه بس هي زي ما قولت وسيلة جيدة للتعارف والتواصل مع ناس زي العسل.. ونافذة للترويح عن النفس وإبداء بعض الآراء.

ايه أكتر حاجة كرهتها ؟

الأساليب المبتذلة اللي البعض بيستخدمها في تعليقاته أو كتاباته.. بعض الناس بتحب تسفه من البعض أو تحقر من آراء الآخرين.. وفيه مدونين فاتحين مدوناتهم للشتيمة والسب لكل حد مختلف في الرأي.

حاسس ان التدوين له تأثير ؟
بالنسبة لي أنا ليه تأثيييييير كبير طبعااااً.. بس للأسف سلبي.. كفاية انه خلاني انسى رسالة الماجستير بتاعتي واللي بقالي سنة من ساعة ما فتحت المدونة مش كتبت فيها كلمة..ههههههههه.. طبعا مش المدونة هي السبب الرئيسي.. بس أهي شماعة بعلق عليها القصور والفشل والتراخي.

تهدي التاج لمين؟

أيامنا الحلوة

نونو 8 بنانيت

عاشقة الجنة

مريم

نهر الحب

دواير

أرواح بلا ثمن؟!!!

حكمت المحكمة ببراءة ممدوح إسماعيل مالك العبارة السلام 98 التي غرقت عام 2006 في حادث راح ضحيته 1034 قتيلا و386 مصابا...لولولولولولولولوليييييي.. تحيا العدل.. تحيا العدل!!!!.. بصراحة كان لازم يحصل كدة علشان الحلقات تستحكم الإغلاق!!.. ليه نستثنى القضاء المصري من الفوضى والفساد المتحكم في كل شيء دلوقت!! هو على راسه ريشة يعني!!!

بس المحكمة نسيت تقول حيثيات حكم البراءة.. والحيثيات اللي استندت ليها المحكمة من وجهة نظري كانت كالتالي.. "استناداً إلى نصوص الدستور وكل القوانين المهلبية في البلد.. وبما أن دماء وأرواح الشعب المصري والبسطاء منهم على وجه الخصوص لا قيمة لها.. وهم لا يستحقون الحياة في بلد حر ديمقراطي يحكمه القانون.. واستناداً إلى مبدأ المساواة الذي يساوي بين كل الضحايا.. وبما أن ضحايا الحوادث الأخرى مثل ضحايا العبارة السلام 95 وضحايا قطار الصعيد وضحايا قطار مرسى مطروح وكل الضحايا الآخرين لم يتم محاكمة المسؤولون عن قتلهم أو محاسبتهم.. وبما أن ممدوح إسماعيل رجل صاحب نفوذ وسلطة لا تجوز محاكمته بسبب قتل بعض الرعاع.. وبما أن اليوم مباراة الأهلي والزمالك والشعب مش فاضي ومش واخد باله من حاجة.. وبما ان هناك زيادة سكانية في مصر لابد من تخفيضها بكل الطرق والوسائل للمحافظة على معدلات النمو السكاني.. وبما ان المواطن المصري هو ارخص سلعة في مصر دلوقت.. فقد أصدرت المحكمة حكمها المشار إليه بضمير مرتاح!!!!"

أن لا أدري لماذا كل هذا الاستخفاف والظلم للمصريين.. كيف يمنح شخص تسبب في مقتل 1034 شخص بالبراءة.. أية أدلة هذه التي استندت لها المحكمة في تبرئة مجرم دمر 1034 أسرة مصرية بسيطة.. ترك أفرادها البلد وتغربوا من أجل توفير لقمة العيش لأسرهم.. لم يطلبوا وظائف ولم يطلبوا اعانات.. فقط تركوا عائلاتهم وهاجروا للعمل وكسب الرزق ليلحق بهم تجار الموت.. أية أدلة هذه التي تسمح باصدار حكم يقتل أهالي الضحايا مرة ثانية بعد أن تيقنوا أن دماء ذويهم ذهبت هدراً..

القضية منذ بدايتها كانت مثيرة للريبة والشك.. لم يتم رفع الحصانة عن النائب المعين في مجلس الشورى إلا بعد أن هرب وترك البلاد.. حتى هروبة تم بمساعدة ناس متنفذين في السلطة.. واليوم يصدر حكم البراءة.. هل الألف شخص الذين قتلوا في مياه البحر لا يستحقون أن يسجن المجرمون شهرا واحدا.. لو كانوا مجرد حيوانات لوجدوا من يدافع عنهم من جمعيات الرفق بالحيوان!!! .. ولكنهم للأسف ليسوا حيوانات.. انهم مجرد أناس بسطاء أرواحهم بلا ثمن ولا قيمة..هذا هو العدل الذي يطبق اليوم!!!

أين أنت!!

لست ناصرياً.. ولكني أعشق هذا الرجل.. وكم تمنيت أن أعيش في المرحلة التي حكم فيها.. لن أتكلم عن ثورة يوليو التي حررت مصر من الاحتلال وأعادتها لأبنائها.. لن أتكلم عن قرار تأميم قناة السويس الذي حرر باقي تراب هذا الوطن ومنحه سيادته.. لن أتكلم عن مشروع بناء السد العالي الذي مازال شامخا يخدم البلد ويوفر لها الكهرباء والمياة ويحميها من الفيضانات ونقص المياه.. لن أتكلم عن قانون مجانية التعليم وما أتاحه من فرص تعليم في مجتمع كان 80% من أبنائه أميون.. لن أتكلم المشروعات الصناعية الضخمة كمصانع الحديد والأسمنت والسيارات والألومنيوم والسكر وغيرها من المصانع والشركات التي يتم بيعها وخصخصتها الآن.. لن أتكلم عن المشروع النووي ومفاعل أنشاص الذي لم يكتمل..لن أتحدث عن قوانين تحديد الملكية الزراعية التي حررت الفلاحين من عبودية أمراء الإقطاع .. لن أتحدث عن وضع مصر في خارطة القوى الإقليمية الكبرى المحركة لمنطقتها وللعالم الثالث كله.. يكفي تأسيس حركة عدم الانحياز التي وضع أسسها.. والدعم الذي قدمه لحركات التحرر في كل العالم العربي وأفريقيا بل والعالم..

لن أتحدث عن كل ذلك، ولكني سأتحدث عن رجل كان كل همه هو خدمة وطنه.. لم يهتم قط بأن يورث أبنائه أو معارفة السلطة.. لم يهتم بامتلاك الملايين والمليارات.. حتى الناس المختلفين معه ومع مشروعه يعترفون بأنه لم يكن فاسدا ولم يشجع على الفساد.. يؤكدون أنه عاش شريفا ونزيهاً ومات كذلك..رجل كان لديه مشروع متكامل للنهوض بوطنه في كل المجالات.. رجل أحب مصر وأعطاها وقته وعمره.. أعطاها مكانتها التي تستحقها في التاريخ.. فأعطته هي الخلود والحب من كل الأجيال التي عاصرته أو لم تعاصره..

لا خلاف أن هناك أخطاء جسيمة وقع فيها وكادت أن تقضي على مشروعه القومي وكل إنجازاته.. أخطاء قادت إلى نكسة يونيو 1967.. لكن هذه الأخطاء لم ولن تلغي إنجازات رجل وهب عمره لمصر.. ويكفي أنه نهض سريعاً وبدأ حرب الاستنزاف التي لم تكن أقل ملحمة من حرب أكتوبر.. فكيف تنتهي انجازات هذا الرجل وهي مازالت قائمه.. فالسد العالي لم ينهار ومازال يمثل شريان مصر.. قناة السويس مازالت شاهده على وطنيته وتمثل شريان آخر لمصر.. المصانع والشركات التي تبيعها الحكومة الحالية مازالت تعمل وتنتج.. كيف يموت كل كذلك لمجرد خطأ حتى لو كان بحجم النكسة..

كم تمنيت لو أن الله يرزق مصر بزعيم مثله لا تشغله السلطة ولا الثروة ولكن يشغله رفعتها وتقدمها .. زعيم يخرجها من تخبطها ويصل بها لبر الأمان.. رحم الله عبدالناصر على قدر ما أعطى وطنه وحفظ كرامة شعبه وأبنائه،،،،،

تاج تاني

التاج ده جاني هدية من سمو الأميرة نونو، وعلشان كدة مش هأقدر أرفضه رغم ان الواجب اللي فيه صعب قوي وطويل عامل زي امتحانات الثانوية العامة بتاعة السنة دي، لكن مفيش مشكلة المهم سمو الأميرة ما تزعلش..

أكتب 16 صفة عن نفسك ؟

يا نهار أبيض 16 صفة؟؟ ودول أجيبهم منين؟؟؟ هنحاول وأمرنا لله

(1) متردد في اتخاذ القرارات المهمة وغالباً اتخاذ القرار بيتم في الوقت الضايع.

(2) عايش حالة من الاكتئاب المزمن، ودي مش عارف بصراحة ايه سببها رغم ان الحمد لله تعالي ظروفي افضل من ناس غيري كتير.

(3) احساس مزمن بالخوف من المستقبل.

(4) طيب ساعات وشرير ساعات تاني.

(5) هاديء ساعات وعصبي ساعات تاني.

(6) مجامل ساعات وصريح بشكل فج ساعات تاني.

(7) بحاول أطيع ربنا.. لكن ساعات كتير بعصيه.. ربنا يسامحني بقى على المعصية

(8) متزمت ساعات.. ومنفتح تماما ساعات تاني.

(9) غيور جدا.. على أسرتي والناس اللي بحبهم.

(10) رومانسي ساعات.. وقاسي ساعات تاني.

انا قولت من الأول الواجب ده طويييييل.. يلا هانت..ههههه

(11) بحب اساعد أي حد أقدر أساعده خاصة اذا كان الحد ده عزيز عندي.

(12) مش بنسى الناس اللي بحبهم بسهوله.. علشان كدة مش بحاول احب حد بسهولة.

(13)لما بكره حد بكرهه بجد.. وعلى قد حبي ليه في الأول بيكون كرهي ليه.

أنا بس ليا سؤال لسمو الأميرة نونو هما ليه 16 صفة!! ايه الفكرة يعني في الرقم 16 ده.. هو ده رقم الحظ بتاعك..هههههههه

(14) بحب الأطفال جدا.. لان حياتهم بريئة.. بس فيه أطفال عفاريت مش بحبهم..ههههه

(15) بحب أعمل شغلي بضمير.. أيا كان بسيط

وأخيييييييييييييييييييييراً

(16) بحب سعاد حسني.. ههههههههههههههه

أهدي التاج لمين؟؟؟

* نعكشة

* أيامنا الحلوة

* أحيانا إسراء حامد

* بندقة

ماذا حدث للمصريين؟؟!!

أب يقتل أطفاله بالسم بسبب فشله في توفير الغذاء لهم؟!!... أب يطعن أطفاله الثلاثة بالسيف دون معرفة السبب؟!!... شاب يقتل خطيبته وأختها وأمها ويدعي الجنون؟!!.. فتنة طائفية في دير أبوفانا!!.. مواجهات مسلحة بين مسلمين وأقباط في المنيا ومحافظات أخرى!!.. أم تعرض أولادها للبيع لعدم قدرتها على تلبية احتاجاتها!!.. مصري يبيع كليته لرجل سعودي مقابل 12 الف جنيه!!.. هذه بعض العنواين التي طالعتها في الصحف خلال الأسابيع الماضية.. ومع كل خبر كنت أتساءل: ماذا حدث لنا نحن المصريين؟!!

جرائم بشعة لم نكن نتخيلها أصبحت شائعة.. حالة غير مسبوقة من انعدام الضمير في كل شيء تقريباً.. فساد أصبح متحكما في كل شيء حتى بات من مسلمات الأمور..ضياع للقيم والمبادئ ينذر بانهيار أخلاقي شامل.. غياب للأمن في الشارع يثير كثير من الاستفهام.. من المسؤول عن كل هذا؟!.. كثير منا مقتنع بأن الحكومة تتحمل العبء الأكبر بسبب عدم قدرتها على توفير العيش الكريم لملايين المصريين.. لكن الحكومة ليست وحدها المسؤولة عما وصلنا إليه.. نحن بالتأكيد مسؤولون؟! .. لو افترضنا أن كل مصري يؤدي عمله باتقان ويراعي ربه وضميره في العمل الذي يقوم به لكانت كثير من الأمور تغيرت.. لو قمنا بواجبنا في التصدي للفساد وفضح الفاسدين وعدم القيام بنفس سلوكهم لتغيرت كثير من الأمور..لو قمنا بدورنا في تربية أبنائنا التربية السليمة وعلمناهم قيم ومبادئ دينهم الصحيحة لما وصلنا إلى ما نحن فيه من تردي أخلاقي.. لو.. لو.. لو..؟؟!!

ثمة سؤال يشغلني منذ فترة: هل الفقر مبرر كافي للتخلي عن قيمنا ومبادئنا؟ هناك كثيرين للأسف يعتقدون بذلك.. وحجتهم بسيطة هي أنك لا تنتظر من إنسان لا يجد قوت يومه أن يلتزم بأخلاق أو مبادئ؟ ولكني مقتنع تماما أن الإنسان لو تربى بشكل سليم على المباديء الصحيحة لن يضحي بمبادئه أو أخلاقه في سبيل لقمة العيش؟! ولكن يبدو أنني كنت مخطئاً!!.. خلال الأسبوع الماضي ذهبت مع اثنين من أصدقائي لأحد المقاهي في أبوظبي لمشاهدة مباراة نهائي كأس أوروبا.. وفي القهوة كانت هناك فتاتان تعملان بها وترتديان لبساً لافتا.. عندها قال صديقي انهما مصريتان؟! فاعترضت بشدة على ذلك ولكن ما ان جلسنا حتى جاءت احداهما تسألنا ماذا نشرب وكانت بالفعل مصرية؟! كان الأمر مستفز لدرجة أني افتعلت معها مشكلة ووجهت لها إهانة لفظية وكادت تتطور الأمور باستدعاء الشرطة ولكن تدخل أصحابي لتهدئة الموقف خاصة انهم يعلمون ان عقوبة ما قمت به من سب علني هي الحبس الذي يتراوح بين شهر وستة شهور.. واليوم وبينما أتجول في أحد المحلات التجارية لفت انتباهي صوت نسائي مصري.. فالتفت لأاجد صاحبة الصوت في زي يكشف أكثر مما يغطي وهي في صحبة شاب غير مصري.. فتساءلت: هل كنت انا المخطئ عندما كونت صورة مثالية عن بنات بلدي، أم أن هذه النماذج تظل حالة شاذة كما كنت مقتنعا دائما؟!!

لا أدرى ماذا حدث لنا؟!.. ولا أدري إلى أين نتجه؟!.. كل ما أعلمه أننا لم نعد مصريين كما كنا؟ وأننا نشهد انتكاسة وتراجعا في كل شيء.. وأتمنى أن نتجاوز هذه المرحلة الخطرة لنعود كمصريين حقيقيين.. نعتز بمصريتينا وبقيمنا ومبادئنا.. أمنية ليست صعبة لكنها تحتاج صحوة مجتمع كادت قيمه ومبادئه تتوارى خلف ستار كثيف من الفساد والقهر والفقر.

معاكسات قبيحة

لا أعتقد أن هناك أي بنت أو امرأة في مصر، وخاصة القاهرة والجيزة، لم تتعرض للمضايقات والمعاكسات السخيفة في الشارع، بصرف النظر عن الشكل أو اللبس أو السلوك. ورغم أن هذا الظاهرة المرضية موجودة بالفعل من فترة طويلة، إلا أن اللافت للنظر هو الأساليب القبيحة والمستفزة اللي بقى الشباب يستخدموها، واللي بتبدي بالكلام الإباحي القبيح ومش بتنتهي عند التحرش الجسدي، وطبعا كلنا لسة فاكرين اللي حصل في عيد رمضان في وسط البلد، واللي الصحافة سمته "سعار جنسي".

اللي خلاني أكتب في الموضوع ده بصراحة حاجتين، الأولى حوار دار بيني وبين زميلة في مصر عن موقف هي تعرضت له قريب واستفزني لدرجة كبيرة جدا، قالت فيه إنها كانت مروحة من شغلها وماشية على الكورنيش رايحة محطة المترو في التحرير وقابلها أتنين شباب بدأو المعاكسة بالكلام القبيح وقربوا منها لدرجة إنها جريت ولما قابلها أمين شرطة استنجدت بيه فرد عليها بمنتهى السخافة وقال "إحنا ناقصينكم انتو كمان" وسابها ومشي فاضطرت إنها توقف تاكسي رغم إن مش كان معاها الفلوس اللي تكفي بس علشان تخلص من المضايقة!!!

الحاجة التانية خبر قرأته النهاردة في صحيفة إماراتية بيقول إن الشرطة الإماراتية نجحت في مواجهة ظاهرة المعاكسة وقضت عليها بنسبة 90% (علما بأنها أصلا محدودة) وقارنت بين نجاح شرطة الإمارات وفشل الشرطة بتاعتنا في مواجهة الظاهرة اللي وصفتها بالمستفحلة في مصر.

وبما إني مقيم دلوقتي في الإمارات فأنا أقدر أقولكم إيه الفرق اللي خلى الإمارات تنجح ومصر تفشل في مواجهة ظاهرة المعاكسات. هنا في الإمارات فيه قواعد صارمة لحماية المرأة؛ يعني لو أي وحدة تعرضت لمجرد معاكسة ممكن تتصل بالشرطة وفي دقايق قليلة بتكون الشرطة موجودة، ولو مسكت الشخص اللي بيعاكس فالعقوبات فعلا تردع أي حد انه يعمل كدة. في مصر الشرطة والأمن مهتم بس بحماية النظام مش بحماية الناس، ولو أي بنت راحت القسم علشان تبلغ عن معاكسات أو غيرة بيبصولها على أنها فتاة ليل وإنها مش محترمة. واللي يفرس أن الشرطة نفسها بتقوم بالمعاكسة.. وأنا فاكر لما كنت بشتغل في مصر كان المركز اللي بشتغل فيه قدام قسم قصر النيل وكان فيه مجموعة من المخبرين والأمناء بيقعدوا قدام القسم من الناحية التانية يعني جنب الشقة اللي كنت أنا بشتغل فيها، وكنت بسمع وأشوف بعيني المعاكسات اللي كانوا بيعاكسوها للبنات و الكلام القذر اللي كانوا بيقوله لدرجة ان بنت زميلتي في الشغل طلبت تنقل مكتبها للدور الثالث علشان تبطل تسمع الكلام ده..

المشكلة مش بس في الأمن المشكلة في الشباب نفسه، تلاقي فيه شباب مقتنع تماما إن البنات بتفرح بالمعاكسة.. طيب منين يا أبو الشباب جبت القناعة دي مش فاهم!!.. ولما تسأل أي حد إيه السبب في انتشار المعاكسات تلاقي الإجابة حاضرة وسريعة وهي إن لبس البنات مش محترم وإن الشباب مش قادر يتجوز ويبروح عن نفسه شوية.. بس هل ده مبرر للتصرفات الحقيرة دي.. حتى لو افترضنا ان البنت مش محترمة في لبسها أو سلوكها.. ليه احنا نتعامل معاها بالأسلوب ده.. المفروض يكون الشاب محترم بصرف النظر عن البن اللي قدامه.. بس فين الاحترام دلوقت.. وبعدين يفسروا ازاي دول معاكسة البنات اللي لبسها محترم؟؟

الإعلام بتاعنا نفسة للأسف بقى بيروج للمعاكسات، وأكيد كلنا عارفين الإعلان السخيف بتاع ميلودي اللي فيه شخص قصير مصورينه وهو بيعاكس كل اللي رايحة وجاية، والإعلان ده للأسف ناس كتيررر معجبة بيه.. غير الألفاظ القبيحة اللي بيتم استخدامها في الأفلام الجديدة في مشاهد المعاكسات!!

الحل بسيط من وجهة نظري، لو كل شاب اقتنع إن البنت اللي بيعاكسها دي ممكن تكون أخته أو أمه أو خطيبته أو مراته أو بنته أكيد مش هيعمل كدة.. ولو الشرطة والأمن قاموا بدورهم فعلا ووفروا الحماية لكل الناس في الشارع مش بس البنات أكيد فيه أمور كتير هتتغير.. ولحد ما ده يحصل بنصح كل بنت تمشي في الشارع تكون مسلحة علشان تعرف تدافع عن نفسها من كلاب السكك!!.

آراء حول الزواج

جلست مع مجموعة أصدقاء وزملاء في العمل من جنسيات عربية مختلفة، من مصر والسودان والعراق والأردن والإمارات والجزائر، لتناول الغداء في المطعم الخاص بالمؤسسة التي أعمل بها، ودار حوار لمدة تزيد عن النصف ساعة حول الزواج، ولكن أكثر ما لفت انتباهي هو إبداء كل الموجودين على مائدة الطعام (وكلهم باستثنائي أنا متزوجون) آراءً سلبية حول فكرة الزواج، فقد تبارى الجميع في سرد النكات والمواقف التي تحاول إقناعي بخطورة الإقدام أو حتى التفكير في هذه الخطوة.. وإن تم ذلك بشكل مرح وكوميدي.

*****

بدأ أحد الموجودين هذا الحوار بنكتة ظريفة قال فيه إن طفلا ذهب لوالده يسأله: بابا هي الحمير بتتجوز؟؟ فرد الرجل قائلاً يا بني هو فيه حد بيتجوز غير الحمير!!!.. قال آخر إذا كان الزواج شر لابد منه فمن الأفضل أن تؤجله للأسبوع الأخير من حياتك!!! وقال شخص ثالث إن الزواج يجعل الرجل أكثر جبناً وخنوعاً لأن سيفكر مليون مرة قبل أخذ أي قرار خوفا على أولاده وزوجته.. وقال رابع إن الزواج يخلق حالة من التبلد الإدراكي التي تصيب الزوجين بعد السنة الأولى من الزواج، ولحل مشكلة التبلد الإدراكي هذه اقترح الرجل أن تكون مدة عقد الزواج سنة أو سنتين قابلة للتجديد بشرط موافقة الطرفين.. إيجار جديد يعني ..هههههههههه

****

من النكت الظريفة أيضاً التي ذكرت، أن شخص ما ذهب لمستشفى الأمراض العقلية وأثناء مروره بأحد العنابر رأى شخصاً يخبط دماغه في الحائط.. فسأل الممرضة ما مشكلة هذا الرجل.. قالت إنه أحب فتاة ولم يتزوجها.. وفي العنبر المجاور وجد شخص آخر يضرب وجهه ورأسه بالشبشب .. فسألها وده ماله هو الآخر.. قالت: ما هو ده اللي اتجوزها!!!!!!

****

وأثناء كلامي مع أحد هؤلاء حاولت طرح فكرة ما فقلت.. طيب ما هو الواحد ممكن بعد الجواز يأخذ قرار... لم يدعني الرجل أكمل الجملة وقال ضاحكاً.. تاخد إيه .. قرار!!!.. لا انسى الكلمة دي بعد الجواز.. انت آخر قرار هتاخده في حياتك هو قرار الجواز وبعد كدة القرار مش هيكون في ايدك حتى لو كان الظاهر غير كدة!!!

*****

وختم أحد الموجودين الحوار بحكمة على لسان جحا قال فيها: الله يلعن اللي اتجوزو قبل مني واللي اتجوزوا بعد من.. فسألوه الناس ليه بتلعنهم يا جحا؟؟ قال لأن اللي اتجوزوا قبل مني وماقلوليش ..واللي اتجوزوا بعد مني ما سألونيش!!!.. ولكن قبل أن ينفض الجمع تذكر بعض الموجودين أنني لم أتزوج بعد.. فقال أحدهم: بس الجواز فيه ميزة برضة إنه بيخليك تستقر وتروح تلاقي فيه حد مستنيك ومهتم بيك.. غير متعة الأطفال.. الحمد لله فيه ميزة ههههههههههه!!

إشارة حمرا

السلام عليكم.. أولاً وقبل كل شيء أحب أشكر كل المدونين الحلوين والمحترمين اللي سألو عن سبب تأخري في الكتابة خلال الفترة اللي فاتت، وأحب أعرفهم اني الحمد لله لسة عايش حر وسليم، مفيش اغتيالات ولا عمليات خطف ولا محاولات اعتقال تمت لغاية دلوقت.. بس كانت شوية مشاغل كدة على شوية احباطات وسدة نفس ربنا ما يحكم على حد...

*****

انتو فاكرين طبعا حكاية سقوطي في امتحان الرويس والباركن بتاع مدرسة السواقة.. أنا كنت نسيت أقولكم اني دخلت الامتحان مرة تاني ونجحت بجدارة الحمد لله.. وكلمة بجدارة دي موجهة للقلة المندسة اللي اتريقت عليا وشمتت فيا ههههههههه.. المهم ان إدارة المرور حددت يوم 15 يوليو كامتحان نهائي في الشارع علشان الرخصة وسلموني بطاقة تدريب علشان اتدرب عند مدرسة خاصة على السواقة في الشارع قبل الامتحان.. وسألت بعض أصحابي هنا عن مدربين كويسين في السواقة.. فدلوني على اتنين.. اتصلت بالأول واتفقت معاه نبدأ يوم الأحد اللي فات بس الراجل قالي ابقى اتصل أكد علي قبل الميعاد بنص ساعة.. وجيت قبل الميعا باتصل بالراجل لقيته في الشرطة لأن العربية اللي بيدرب عليها عملت حادثة.. قولت الحمد لله انها مش من نصيبي انا الحادثة دي.. اتصلت بالتاني وحددت معاه ميعاد وبنفس المنطق طلب اني أكد الميعاد قبلها.. اتصلت بالراجل اعتذر وطلب تأجيل الميعاد اسبوع.. ليه يا عم الحج.. قال علشان في وحدة معرفته لبنانية هتمتحن في يونيو ومستعجلة.. الراجل بصراحة عنده حق دي بنت مش خنشور زي أنا كدة.. وبعدين لبنانية يعني نانسي وهيفا وانتو عارفين بقى..

****

المهم اني اتفقت مع مدرب تالت، سوري ضخم الجثة عريض المنكبين شلولح ... وأخيرا التزم وجه النهاردة الصبح وبدأت التدريب على السواقة في الشارع ... أول ما ركبت وظبطت المرايات وربطت حزام الأمان.. الراجل قالي يلا اطلع سيدا (سيدا دي معناها على طول يعني من غير ما تروح يمين ولا شمال).. سمعت الكلام وطلعت سيدا.. ما هو انا لو ما مش سمعت الكلام بالذوق هاسمعة بطرق تاني.. ههههههه.. وبعدين لقيت الراجل بيقولي انت لازم تشيك في المرايات التلاتة باستمرار اللي على اليمين واللي على الشمال واللي في النص.. قولتلة ازاي يعني أبص على المرايات واسيب الطريق قدامي.. الراجل بصلي بنظرة شرز.. قولتله حاضر.. وفضلت لاوح رقبتي على المرايات والطريق لمدة ساعة.. وطلعت بالعربية على الطريق السريع والراجل طلب اني اسوق على 120 كلم/س وبصراحة كانت السواقة بالسرعة العالية دي ممتعة.. لغاية ما لقيت المدرب راح دايس على الفرامل اللي عنده مرة واحدة وانا اتخضيت.. هو فيه ايه.. بصلي وقال انت مش شايف الإشارة الحمرا قدامك.... آه والله ده فيه اشارة حمرا أهي بجد؟؟؟؟؟ أنا طبعا قولت خلاص مفيش فايدة .. بس الراجل طمني وقال لا ده عادي ده لسة أول درس وانت احسن من غيرك كتيير.. قولت الحمد لله لسه فيه أمل.. المهم محدش يشمت بعدة كدة.. ههههههه

عميل أمريكاني

رغم اني مش بحب أتكلم عن شغلي أو اللي بيحصل فيه، لكن معلش هاضطر أكسر القاعدة المرة دي لأن الموقف اللي حصل يستحق نكسر القاعدة علشانه، الموضوع باختصار اني كنت بتفرج على بعض القنوات الإخبارية في التليفزيون وبتابع اللي بيحصل في لبنان، واستفزني جدا اللي شوفته خاصة من حزب الله اللبناني اللي قواته وميليشياته احتلت بيروت وقطعت الطرق باستخدام السلاح، ورغم اني كنت يوم أجازة من الشغل لكني قررت أكتب موضوع عن الأحداث دي كلها، وطبعا الموضوع كان كله انتقادات لحزب الله، قولت فيه ان السلاح بتاعه فقد الشرعية وانه مبقاش سلاح مقاومة وان قواته بقت عاملة زي الميليشيات اللي في العراق..إلخ. والموضوع اتنشر على موقع المؤسسة اللي انا بشتغل فيها.

****

المهم بعد دقايق من نشر الموضوع اتصل واحد زميل لي في الشغل (باحث لبناني في الإدارة الاستراتيجية) وأبدى إعجاب غير طبيعي بالموضوع وعرض انه ياخد الموضوع معاه البيت يسهر عليه ويترجمة علشان يتنشر على الصفحة الانجليزية للموقع بسرعة، وفعلا اخد الموضوع وترجمه واتنشر تاني يوم. وبعد ما رجعت البيت اتصل زميل تاني انتقد الموضوع وقال إنه أسوأ موضوع انا كتبته من يوم ما جيت هنا، واتهمني بعدم الموضوعية والانحياز ضد حزب الله اللي بيدافع عن كرامة العرب والمسلمين، واني بكرر نفس كلام أمريكا وإسرائيل اللي عايزين يدمروا الحزب.. قلت عادي كل واحد شايف الموضوع من زاويته هو .. وبعدين اتصل كذا واحد وقالوا رأيهم وكانو طبعا منقسمين واحد مؤيد والتاني معارض حسب موقف كل واحد من حزب الله وإيران.

****

لكن الغريب بقى ان أحد زملائي في العمل وهو باحث برضه بس كبير في السن (فوق الخمسين سنة) حذرني وقال: انت كدة دخلت عش الدبابير ومش بعيد تتعرض للاستهداف من حزب الله وإيران، وممكن يعتبروك عميل أمريكي!!!! (يا نهار مش فايت هي وصلت للقتل والعمالة ههههههه) طبعا أنا ضحكت جدا وعدى الموضوع..

****

تاني يوم وانا في الشغل جالي تليفون من واحد قال انه تبع السفارة الاسترالية وقال ان نائبة السفير الاسترالي في أبوظبي عزماني على فنجان قهوة في اي وقت أنا أحدده علشان تتناقش معايا في الموضوع... أنا سألته هو فيه ايه بالظبط.. قال انها قرت الموضوع بتاع لبنان وعجبها وعايزة تتناقش معاك فيه!!! انا طبعا اعتذرت وقولتله انا مقدرش اجتمع مع أي حد على مستوى رسمي الا بعد موافقة المؤسسة اللي انا فيها وحولته على المسؤولين عني علشان يتفاهموا مع بعض.. المهم لما الباحث زميلي ده عرف حكاية السفارة اعتبرها دليل على مساعي السفارة الاسترالية (ومن وراها الأمريكية) لتجنيدي لحسابهم..ههههههههه.. وفيه واحد تاني تفتق ذهنه عن خطر كبير وهو ان السفارة الايرانية في الامارات ممكن تاخد بالها وتقرأ الموضوع ويحطوني في دماغهم، وانتو بقى عارفين يعني ايه أحمدي نجاد يحطني في دماغه..هههههههه

****

أنا بحكي القصة دي كلها بصراحة علشان أوضح حاجة صغيرة هي ان ازاي الناس (وخاصة المصريين) بيحبوا يضخموا الأمور ويحطو سيناريوهات مستحيلة وبيصدقوها.. وازاي كمان انهم مش بيتقبلو الرأي الآخر، جايز انا عندي رأي مختلف عن رأي أي حد .. عادي جدا.. وكمان مش معنى ان رأيي يتفق مع رأي أمريكا أو استراليا في بعض المواقف يبقى خلاص بقيت بعبر عنهم وعميل ليهم بالعكس انا كتبت موضوعات كتير عن أمريكا وكلها تقريبا انتقادات وشتايم ليها ولسياستها.. الموضوع باختصار مسألة رأي جايز يكون صح وجايز يكون غلط.. لكنه مش عمالة ولا تخوين طبعا..ههههههههههههههه..

***

مهلبيات

ثمة كثير من الأحداث والمواقف التي نشهدها أو نسمعها ولا يمكن تفسيرها بالمنطق أو العقل، لكنها تكشف بوضوح مدى التخبط والارتجالية التي أصبحنا نعيشها، لذا لم أجد غير كلمة "مهلبيات" لوصفها، ومن هذه المهلبيات مثلاً:

* إدراج اسم أحد أعضاء الحزب الوطني ضمن كشوف الفائزين بالتزكية لمجلس محلي ميت غمر في حين أن اسمه لم يكن أصلاً ضمن كشوف المرشحين النهائية. وهذا طبعاً إنجاز غير مسبوق، فلم نسمع في تاريخ إجراء أي انتخابات في أي دولة من دول العالم كله عن فوز مواطن لم يرشح نفسه ولم يزكه أحد؟، ولكنها بركات الحزب الوطني!!

* نجاح مرشح "ميت" في انتخابات محليات دمياط؛ حيث حقق «المرحوم» محمد السيد أبورجب انتصاراً كاسحاً في انتخابات المجالس المحلية في قرية ضرغام التابعة لمركز دمياط .. واستطاع أن يحقق أعلي الأصوات بالدائرة، متفوقاً علي منافسيه من الأحياء علي الرغم من وفاته قبل إجراء الانتخابات بيومين!!

* فجأة ومن دون مقدمات، صدر قرار جمهوري بإنشاء محافظتين جديدتين في مصر، محافظة حلوان ومحافظة 6 أكتوبر، يعني بقينا 28 محافظة في عين العدو، الغريب إن الحدود بتاعة المحافظات اتغيرت واتعدلت أكثر من مرة بعد صدور القرار بساعات.. وده طبعا دليل على حكمة القرار ودقته.. محدش يصدق القلة المندسة اللي بتقول انه عشوائي وارتجالي ومتخبط!!.. أنا بس عايز أعرف انا دلوقت تبع أنهي محافظة!!!

* في لفتة إنسانية عظيمة قررت الحكومة المصرية تصدير الغاز الطبيعي لإسرائيل بسعر أقل من السعر العالمي بمعدل 25% وأقل من السعر المحلي بمعدل 35%، لمساعدة إسرائيل على مواصلة نموها الاقتصادي.. الغريب إن الحكومة المصرية وعلشان تعوض الخسائر بتاعتها في الصفقة دي قررت رفع الدعم عن الغاز والكهربا بالنسبة للمصانع المصرية كثيفة الطاقة، وده طبعا معناه إن أسعار المنتجات اللي بتنتجها المصانع دي، خاصة مصانع الحديد والأسمنت والألومنيوم والأسمدة، هترتفع بنسب كبيرة أكتر ما هي مولعة دلوقت، واللي هيتحمل الفرق هو احنا.. يعني باختصار الحكومة هتبيع الغاز لإسرائيل بأسعار مخفضة والفرق نتحمله احنا.. شوفتوا إنسانية وحب لإسرائيل أكتر من كدة.. متهيألي أمريكا نفسها ما بتعملش كدة.

* في نفس اليوم اللي حكم فيه القضاء العسكري على 25 من قادة الإخوان بالسجن مدد تتراوح ما بين 3 و10 سنوات، مع ان القضاء المدني برأهم قبل كدة، برأت محكمة مدنية نائب الحزب الوطني هاني سرور، اللي كان متهم في قضية توريد أكياس الدم الفاسدة.. ليه لأ مش هاني سرور عضو بارز في الحزب الوطني إزاي يتحكم عليه يعني هي فوضى.. وبعدين الراجل كان بيقدم خدمة وطنية عظيمة لمصر والمصريين.. الراجل كان بيريح المرضى بالدم الفاسد علشان يموتوا ويرتاحوا من الألم والمرض وكمان البلد تخف من السكان.. يبقى بيخدم البلد والشعب ولا لأ؟؟؟ .. وعلى رأي الشاعر.. يا مصر لو نيلك صلصلة مش هيكفي الكوسة اللي فيكي!!!!!!!!

* الإخوان المسلمين قرروا عدم المشاركة في اضراب 6 أبريل.. وبعد شوية أعلنوا مشاركتهم في إضراب 4 مايو..إيه اللي حصل خلاهم يغيروا رأيهم مش فاهم.. بس الغريب ان المشاركين في إضراب مايو أقل بكتير قوي من اللي شاركوا في إضراب إبريل.. وده دليل قاطع على التأثير الكبير للإخوان في الساحة المصرية!!.

* الريس بتاعنا كتر خيره ربنا يطول في عمره ويحكمنا 80 سنة كمان قرر منح الشعب علاوة 30%.. فالشعب قليل الأصل عمل إضراب في عيد ميلاده الثمانين.. شوفتوا شعب زي ده ياكل وينكر!!!


كفاية كدة ياريت اللي عنده مهلبيات تاني يقول عليها

أول تاج

ده أول تاج يجيلي بصراحة.. شوفته في بعض المدونات وعلقت كمان عليه .. لكنه أخيرا أصبح ملكي أنا.. جاني هديه من همس الحياة .. بنت الصعيد الجواني الجدعة، المتفتحة، الذكية .. سلام يا جدع لبنت الصعيد الجواني ولكل بنات مصر.. سلام مربع شحط محط بس من غير ضرب نار... وبما إني هاتقمص دلوقت دور الملك المتوج.. فأنا هاقول أحلى كلام وتهييس.. مش عايز حد يعارض.. مفيش ديمقراطية عندي .. أنا أتكلم وانتو تقولوا آمين حتى لو مش كنتم فاهمين .. هي دي الديمقراطية .. الديمقراطية اللي أنا أعرفها هي حكم الملك (اللي هو أنا دلوقت) للشعب من غير رضا الشعب.. الدستور هو كلامي حتى لو كل شوية اتغير.. مصلحتي الشخصية هي المصلحة العليا الوحيدة.. فلوس البلد هي فلوسي.. الهدف الأسمى إني أفضل متوج على كرسي الحكم لحد ما أموت (علشان كدة أنا ممكن ما أمررش التاج لحد تاني ههههههههه)..

سيبونا بقى من التهييس ده.. قواعد التاج بتقول إني أتبع الخطوات الآتية، وأنا هاتبعها بس علشان خاطر همس الحياة:

1ـ أذكر 10 أشياء عن نفسك:

هو صعب إن الواحد يتكلم عن نفسه، بس أعمل ايه كله يهون فدا التاج

(1) متردد كتير قوي خاصة في اتخاذ القرارات المصيرية

(2) دايما ببص للمستقبل بنظرة تشاؤمية وبقلق، رغم اني انسان ناجح في شغلي وحياتي الحمد لله، بش مش عارف ليه دايما قلقان من بكرة، يمكن لأن كل الأخبار اللي بتجيلي من مصر كئيبة أو معظمها كدة، أو يمكن يكون قلة ايمان بالله، بس دي الحقيقة

(3) كئيب، وعلشان كدة بحب الأفلام والأغاني النكدية
(4) سفسطائي، يعني ساعات أحب أجادل الناس في حاجات انا عارف إنها غلط بس لمجرد الجدل وخلاص، وساعات بيكون الهدف فتح مجالات للحوار أكتر.
(5) دماغي ناشفة، لما بقتنع بحاجة صعب أغيرها بسهولة، ولما بعاند عليه العوض..هههههه
(6) ناس كتير من اللي يعرفوني بيقولوا اني طيب، معرفش ليه طبعا
(7) كرامتي فوق كل اعتبار، ودي حاجة مهمة جدا عندي، لو حسيت في أي سلوك او كلام محاولة للمساس بكرامتي مش بسمح بيها مهما تكون النتيجة.
(8) بحب أساعد الناس مادام في استطاعتي أعمل كدة
(9) بحب أرخم في بعض الأوقات، بس على الناس اللي بعزهم واللي يعرفوني كويس، يعني الرخامة عندي دليل معزة وحب.
(10) بحب أتفرج على الأفلام والمسلسلات الرومانسية الحزينة

2/ اختر 5 أشخاص تهدى لهم التاج:
ـ أيامنا الحلوة
ـ بندقة
ـ د/ أجدع بنوتة
ـ أحيانا
ـ على الطريق

3/ لا تهدى التاج لمن أهداك اياه
ماشي يا سيدي انت تؤمر ولو ان بصراحة اللي أهداني التاج ده يستحق تاج من الألماظ

4/ أترك لصديقك الذى أهداك التاج بان التاج نزل وتعالى شوفه
بس كدة من عنيا الاتنين
......

عفريت في المطبخ

بما ان النهاردة وبكرة أجازة، فأنا قررت أطبخ زي ما بعمل كل أسبوع

نزليت صليت الظهر واشتريت الأكل اللي هاطبخة ورجعت

وبدأت الماتش بتاع الطبيخ، لكنه المرة دي كان غير طبيعي؟؟

حطيت اللحمة في المية على البوتاجاز ومعاهم بصلة صغيرة ومكعب مرقة دجاج وشوية توابل

وجبت البصل!! وآآآآه من البصل.. وبدأت أقطعه.. أنا أقطع وعنيا بتدمع.. لوما الدموع زادت في عينيا مديت ايدي وانا مش شايف طبعا علشان اجيب المناديل اللي جنبي امسح بيها الدموع دي، رحت خابط الاطباق وجايبها على الأرض؟؟

طاااااااااخ.. طااااااااااااخ.. طاااااااااااااااخ

فيه ايه؟؟؟؟

ببص على الأرض لقيت كل الأطباق اللي كانت جنبي وقعت واتكسرت حتت صغيرة؟؟!!

سيبت البصل ونزلت الم الحاجات المتكسرة دي وبعد ما خلصت رجعت للبصل تاني

وأول ضربة سكين في البصلة كانت جامدة من الغيظ على الاطباق؟؟ السكين قسمت البصلة واخدت حتة من صباعي؟؟؟

عالجت الجرح بشكل بسيط وكملت تقطيع البصل وحطيته على النار

التليفون قاعد يرن يرن، سيبت البصل على النار وخرجت اشوف مين على التليفون وقعدت ارغي لغاية ما شميت ريحة الشياط؟؟؟؟؟؟؟؟؟؟ البصل اتحرق؟؟؟؟؟؟؟؟؟

طيب وبعدين كدة الطبخة باظت؟؟؟؟؟

قولت خلاص اعمل شوية مكرونة وشربة مع اللحمة المسلوقة وبس؟؟ مفيش حل تاني

وجيت قعدت أقلب في المكرونة لغاية ما بدأت تحمر، ومسكت الحلة بتاعة الشربة واللحمة وهي بتغلي علشان احط شوية شربة على المكرونة، بس كان الدخان اللي خارج من الحلة سخن جداااا فلسع ايدي وسبت الحلة ادلقت كلها على البوتاجاز والمكرونة؟؟؟

الحمد لله اني خرجت سليم؟؟؟؟؟

سبت المطبخ وخرجت وقعدت أفكر ؟؟؟ هو فيه ايه؟؟؟؟؟؟؟؟؟؟؟

أكيد عفريت؟؟؟؟ أصل ده مش طبيعي؟؟؟؟؟؟؟؟؟

وفي النهاية غيرت هدومي ولبست ونزلت اتغديت برة؟

وراحت الطبخة كلها بعد ما اتبهدلت أنا والمطبخ؟؟؟

والسبب مجهول؟؟

على فكرة دي مش اول مرة أطبخ فيها.. بالعكس انا بطبخ حلو قوي، بس مش عارف ايه اللي كان بيحصل المرة دي؟؟

ياريت بقى لو حد عنده وصفات أكل سهلة ومفيش فيها بصل يقولي!!!!!!!!

مصر مش بخير

هل تخيل أحدكم نفسه وهو يستيقظ في الصباح ليرى أن الفوضى تعم البلد، وأن الجميع يتقاتلون لنهب ما يستطيعون نهبه؟!

هل تخيل أحدكم نفسه وهو جالس مع أسرته في بيته أن هناك من يقتحم هذا البيت ويسطوا عليه ويدمر ما فيه؟!!

من منا لم يخلد بذهنه للحظة انه ربما يتعرض وهو يسير في الشارع لسطو مسلح وربما للاعتداء؟!!!

بالتأكيد لا أحد منا يتمنى حدوث ذلك.. ولا أحد يحتمل حدوثه..

إنها فقط مجرد أفكار تراود ذهني وأنا أتابع تطورات الأوضاع في مصر

هناك من يتحدث عن ثورة جياع.. وإذا حدثت هذه فالفوضى حتما قادمة؛ لأن الجياع لا يمكن السيطرة عليهم!!

هناك من يتحدث عن انفجار متوقع في أي لحظة نتيجة تزايد معاناة الناس تحت وطأة الأسعار وغلاء المعيشة!!

الغريب أن الأمور تتفاقم.. والحكومة لا تحرك ساكناً.. إنك لا تشعر أن هناك حكومة تدير البلد وتحاول أن تتعامل مع مشكلاته.. لا تشعر بوجود الحكومة إلا من خلال قوات الأمن الكثيفة التي يتم نشرها لمواجهة الإضرابات والاعتصامات.. وهنا مكمن الخطورة، فترك الأمور تتفاقم قد يصل بها إلى مستوى لا يمكن السيطرة عليه حتى بقوات الأمن الكثيفة..

مصر ليست بخير الآن.. إنها تمر بأصعب فترات تاريخها.. والخوف كل الخوف أن يتكرر المشهد الذي رأيناه جميعاً في العاصمة العراقية يوم سقوط بغداد من عمليات نهب وسطو وتخريب، ولكن ليس كنتيجة لاحتلال خارجي وانما انفجار داخلي.. قد أكون مفرطاً في التشاؤم.. ولكن اذا استمرت مرحلة اللادولة التي نعيشها حاليا فإن كل شيء قد يكون ممكنا!!

لا أملك إلا أن أدعو الله بأن يحمي مصر.. أرض الكنانة.. وأن يحفظ أبنائها من كل سوء.. وأن يرحمنا جميعا ويلهمنا طريق الرشاد.

أنا سقطت يا مينز!!!!

من ساعة ما رجعت من الأجازة في أول سبتمبر اللي فات وأنا بفكر جدياً أجيب عربية

انتو عارفين طبعا (أو حتى لو مش عارفين مش مشكلة أديكم بتعرفوا) أن أبوظبي بقت زحمة قوي وعلشان الواحد يقدر يحصل تاكسي بقت عملية صعبة والجو حر ما يقدرش يستنى كتير

وبعد تفكير عميق قررت أتعلم السواقة، وبما إني هابدأ من الصفر كان لازم أدخل مدرسة المرور في أبوظبي

ورحت فعلا فتحت ملف في المرور ودفعت حوالي 2500 درهم (حوالي 4000 جنيه مصري) وبدأت التدريب الممل

وبعد خمس شهور وصلت أخيراً لأول اختبار كان مفروض يتعمل في المدرسة قبل ما أخرج أتدرب في الشارع

النهاردة كان ميعاد الامتحان، وفعلاً دخلت وكان الامتحان سهل جدا عبارة عن ازاي تقف بالعربية في الباركن بشكل صحيح

وكانت النتيجة!!

صدمة!!!

أنا سقطت يا مينز!!!

ما استوعبتش اللي حصل..

قولت يمكن دي كدبة إبريل باعتبار النهاردة أول إبريل

ازاي واحد زيي كدة: عبقري، عظيم، ذكي، متميز يسقط!!

يا فضيحتك يا طنط فكيهة!!!!

وبعد ما فقت من الصدمة.. افتكرت البوست الأخير بتاعي اللي عن الايمان بالقضاء والقدر.. قولت الحمد لله

المفروض اني أعيد الامتحان قريب.. بس أنا بفكر بصراحة أجيب عربية كاروا بحمار.. أو توك توك في الأول وبعدين أتدرب على العربية

تذكرت قول الشاعر : لكل عظيم (اللي هو أنا) هفوة.. ولكل جواد كبوة

وكل سقوط وأنا طيب

هل نحن مؤمنون بقضاء الله وقدره؟

إذا سألت أي شخص مسلم: هل أنت مؤمن بقضاء الله وقدره؟

تأتي الإجابة سريعة وبلا أدنى تردد؟

نعم أؤمن بقضاء الله وقدره

ولكن.. إذا تعرض هذا الشخص لمكروه.. هل سيكون موقفه معبراً عن هذا الإيمان؟

في معظم الحالات تكون الإجابة لا..

فهناك من ينهار .. وهناك من ييأس من الحياة ويتمنى الموت..

هناك من يفقد الثقة في كل شيئ حتى في قدرة الله عز وجل وعدله وحكمته!!

قليلون جدا هم من يثبتون حقاً أنهم يؤمنون بقضاء الله وقدره

لو كنا حقاً نؤمن بقضاء الله وقدره فلماذا نخاف من المستقبل؟

لماذا نلجأ لنفاق البشر ونحني رؤسنا لغير الله.. ونحن نعلم انه هو الرزاق الكريم؟

لماذا نجزع عند كل مكروه؟!!

لو كنا حقاً نؤمن بقضاء الله وقدره.. لن نخشى شيئاً

لن نحزن أو نتشائم.. لن نخاف أحداً مهما كان سلطانه وجبروته

نحن فقط نحتاج لنؤمن بحق بأن كل شيء مقدر لنا

بأن ما أصابنا لم يكن ليخطئنا.. وأن ما أخطئنا لم يكن ليصيبنا كما أخبرنا الرسول الكريم

قال تعالى: "قُلْ لَنْ يُصِيبَنَا إِلَّا مَا كَتَبَ اللَّهُ لَنَا هُوَ مَوْلَانَا وَعَلَى اللَّهِ فَلْيَتَوَكَّلِ الْمُؤْمِنُونَ "(التوبة:51)،

اللهم إني أسألك إيماناً راسخاً بك وبقضاءك يا كريم

أجمل ما قيل عن الحب

* قمة الحب أن يجبرك الصمت على الكلام فيعجز الكلام عن التعبير فتصمت وتبقى النظرات.

* الحب كالحرب من السهل أن تشعلها . . من الصعب أن تخمدها

*الحب هو اللعبة الوحيدة التي يشترك فيها اثنان ويكسبان فيها معاً أو يخسران معاً .

* الحب جزء من وجود الرجل ، ولكنه كل وجود المرأة

* الحب : تجربة وجودية عميقة تنتزع الإنسان من وحدته القاسية الباردة لكي تقدم له حرارة الحياة المشتركة الدافئة

* قد يولد الحب بكلمة ولكنه لا يمكن أبداً أن يموت بكلمة

* الحب لا يقتل العشاق . . هو فقط يجعلهم معلقين بين الحياة و الموت

* في الحب خطابات نبعث بها وأخرى نمزقها وأجمل الخطابات هي التي لا نكتبها

* تكلم هامساً عندما تتكلم عن الحب ( وليم شكسبير )

* الحب جحيم يُطاق . . والحياة بدون حب نعيم لا يطُاق ( كامل الشناوي )

* قد تنمو الصداقة لتصبح حباً، ولكن الحب لا يتراجع ليصبح صداقة ( بيرون )

* الحب تجربة حية لا يعانيها إلا من يعيشها ( سيمون دى برافو )

* الحب المجنون يجعل الناس وحوشاً (فيون)

* إذا سمعت أن امرأة أحبت رجلاً فقيرا، فاعلم أنها مجنونة، أو اذهب إلى طبيب الأذن لتتأكد من أنك تسمع جيداً (برونولي)

إلى أين نحن ذاهبون؟!!!

كلما أتأمل الوضع في مصر ينتابني احساس قوي بالخوف والقلق

جميع المؤشرات تنذر بأننا ذاهبون في اتجاه الفوضى.. الفقر.. وربما الانهيار!!

كل شيء تقريبا بات لا يبعث على التفاؤل.. أصبح يشعرنا بعدم الأمان!!

فلننظر حولنا ماذا يحدث؟!!!!!

معدلات الفقر وصلت حدودا لم نشهدها حتي بعد نكسة يونيو 67، وبلغت نسبتها نحو 52%، أي ما يزيد علي 35 مليون مصري يعيشون تحت خط الفقر.

معظم الناس أصبحت تصارع كالوحوش من أجل الحصول على قوت يومها، في الوقت الذي أصبحت فيه مأكولات كالفول والطعمية والعدس سلعاً ترفيهية يصعب على الكثيرين الحصول عليها.

أما عمليات التعذيب والإهانة والأساليب الحاطة بكرامة البشر فحدث ولا حرج، وما تم الكشف عنه لا يمثل إلا أقل القليل مما هو موجود بالفعل

سعر طن الحديد ارتفع في أسابيع قليلة من 3 آلاف إلى 6 آلاف جنية لترتفع معه أسعار العقارات وإيجارات الشقق والمساكن ويجد الشباب نفسه بلا أمل في العثور على شقة يبدأ فيها حياته الجديدة!!

الانحراف السلوكي والأخلاقي بلغ حدودا لم يكن أبدا تصورها في مجتمع كانت تسوده القيم الأخلاقية المثلى والتدين والاعتدال، وما حدث من جرائم تحرش جماعي في وسط البلد في عيد رمضان، وما يحدث كل يوم من جرائم أخلاقية كالتحرش والاغتصاب والشتائم ينذر بانهيار أخلاقي شامل، ويكفي أن نشير إلى أن عدد حالات الاغتصاب في مصر تبلغ أكثر من عشرين ألف حالة سنوياً، بحسب بيانات المجلس القومي للبحوث الاجتماعية والجنائية، وهي نسبة خطيرة تنذر بكارثة محققة!!

معدلات الزواج بين المصريين خلال العام الماضي سجلت أدنى مستوى لها خلال الخمسة أعوام الماضية، حسب التقرير السنوي للجهاز المركزي للتعبئة العامة والإحصاء، والذي أشار في تقرير آخر صدر نهاية العام الماضي إلى وجود نحو مليوني مطلقة، وأن 240 حالة طلاق تقع يوميا بمعدل حالة كل ست دقائق، فيما بلغ عدد الذين بلغوا سن 33 عاما ولم يتسن لهم الزواج ثمانية ملايين و963 ألفا منهم نحو أربعة ملايين امرأة.

الفساد أصبح هو المتحكم في كل شيء، متغلغلا في كل شيء، محركاً لكل شيء.

معدل البطالة بلغ بحسب بعض الاحصائيات نحو 30% من قوة العمل المصرية، أغلبيتهم الساحقة من الشباب، وحتى الذين يعملون يعانون بشدة من تدني مستويات الأجور والتي لم تعد تستطيع توفير الحد الأدني من المتطلبات الضرورية للحياة الأدمية في ظل الارتفاع الجنوني في أسعار كل شيء!!

الأمن والأمان أصبح شيئاً مفقوداً في الشارع المصري، ورغم أن وزارة الداخلية المصرية بها أكثر من مليون عنصر أمني، إلا أن كل هؤلاء موظفون فقط لحماية أمن النظام الحاكم، الأمر الذي دفع بمعدلات الجريمة في مصر إلى الارتفاع وبمعدلات خيالية، بحيث لم يعد أحد آمنا على نفسه أو ماله أو أبنائه!!

هناك الكثير والكثير من المؤشرات الأخرى التي تجعل نظرتنا للمستقبل سوداوية.. تجعلنا نتساءل بخوف وبقلق..

إلى أين نحن ذاهبون؟!!!!!

محرقة غزة

هذه الرضيعة قتلتها القوات الإسرائيلية لأنها "إرهابية" تطلق الصواريخ على إسرائيل!!!!!!!!!!!!!!!1

إنها استشهدت في مجزرة بشعة نفذتها قوات الاحتلال الإسرائيلي ليست الأولى ولن تكون الأخيرة في مسلسل المذابح الصهيونية بحق العرب والفلسطينيين



من دير ياسين إلى مدرسة بحر البقر وقانا وغزة.. لن تتوقف المجازر الإسرائيلية طالما نحن متخاذلون!!!



دعوا ضمائركم تنطق.. تصرخ.. فنحن أيضا مسؤولون عن هذه المجازر
محاسبون على دم هؤلاء الأطفال