الخميس، 14 أغسطس 2008

احترم نفسك

أكيد كلنا سمعنا عن حملة احترم نفسك اللي بتحاول تواجه ظاهرة قبيحة بدأت تستفحل في مصر وهي ظاهرة التحرش الجنسي، اللي بقت عاملة زي السرطان الخبيث اللي انتشر في المجتمع كله للأسف. وبصراحة كنت بتوقع ان الكلام في الموضوع ده بيتم تضخيمه، لكني اتصدمت لما قريت خبر في الصحف عن استطلاع عمله المركز المصري لحقوق المرأة اتذكر فيه إن نسبة 98% من النساء الاجنبيات اللي زاروا مصر، و83% من المصريات تعرضوا للتحرش الجنسي، لكن الأخطر من النسبة دي، ان ٦٢% من الرجال المصريين اعترفوا بأنهم بيتحرشو بالنساء. يعني مش بس قلة أدب لا وبجاحة كمان؟!!.
الغريبة ان نسبة كبيرة من الشباب والبنات كمان بيقولو ان السبب في انتشار الظاهرة القبيحة دي هو لبس وسلوك البنات، وسمعنا عن حملة جديدة اسمها احترمي نفسك، طيب ازاي نفسر تعرض البنات المحجبات للتحرش، ده فيه حتى بنات منقبات قالوا انهم تعرضوا لنفس الاهانة دي. وياريت الامر يقتصر على الشباب والبنات، ده حتى الاطفال الصغيرين بقم هما كمان مشكلة. كنت بتفرج مرة على برنامج 90 دقيقة وكان فيه طالبة في الثانوية بتتصل بتحكي مشكلة، المشكلة ايه بقى، ان باب مدرستهم ،(ثانوية بنات) قدام باب مدرسة ابتدائي بنين، والبابين بيتفتحو مع بعض، والعيال بتوع ابتدائي بيضايقوا البنات ويتحرشوا بيهم باللمس بطريقة وحشة.. طب هم الاطفال دول عارفين معنا الحاجات اللي بيعملوها..
فيه مشكلة أخلاق بجد.. والخوف ان المشكلة تزيد عن حدها في المستقبل، يعني لما الاطفال الصغيرين دول يكبروا هنتوقع منهم ايه؟؟ اذا كانوا وهما صغيرين بيعملوا كدة.. امال لما يكبرو يعملوا ايه؟؟؟ وبعدين هو الواحد ممكن يأمن ازاي على اخته أو بنته أو مراته انها تنزل الشارع أو تروح المدرسة او الجامعة او الشغل؟؟؟ بالتأكيد الامور مش سيئة جدا.. ولسة فيه قدر من الأمان.. لكنه للأسف بيقل كل يوم عن اللي قبله.
اعتقد ان المطلوب مش نعمل حملات ونطالب الناس انها تحترم نفسها.. المطلوب ان يكون فيه قانون رادع يحاكم اي حد يقوم بأي فعل من افعال التحرش.. انتو فاكرين يعني ان الاوروبيين ناس محترمين.. بالتأكيد لا بس فيه قانون والناس كلها بتحترمه لان مخالفته هتعرض اي واحد للعقاب.. المطلوب حملة لإصدار قانون يجرم ظاهرة التحرش.. المطلوب ان الامن يتحرك في الشارع ويحمي الناس كلها مش البنات بس ويكون مصدر أمان للناس مش مصدر خوف.. مش كفاية ابدا نطالب الناس انها تحترم نفسها.. لانها مش هتحترم نفسها ابدا ما دام مفيش قانون ممكن يعاقبها ومادام مفيش أمن بيردعها..

هناك 34 تعليقًا:

غير معرف يقول...

المشكله ان في فعلا ازمه اخلاق و قله ضمير
ياريت بردوا نشوف كل الزوايا
يعني شاب عمره عمر زواج و بنات لابسين من غير هدوم
بردوا ضغط بس مش مبرر ابدا بس في ناسضعاف نفوس
في حاجه تانيه كمان
ان البنت مش بتتكلم
بتقف ساكته
مش عارفه خجل ولا حاجه تانيه لكن اعتقد لو اخدت كل بنت موقف كل واحد هيحترم نفسه من غير قانون
و كمان الناس اصبحوا سلبيين
و كل واحد مبدؤه و انا مالي
(((ياعم خلينا نعيش سوق يا اسطي)))

اخي في حب مصر
موضوعك شائك و حساس
يااااااه بقي في حمله عشان الناس تحترم نفسها
لو كل واحد فينا قرب من ربنا شويه هيعرف ان الدنيا متسواش كل الذنوب دي لو يتخيل انه ممكن يموت في لحظه هيلعن الحرام
احنا للاسف عندنا ازمه دين
وده لاننا خلينا ماده الدين ماده هامشيه في لمدارس
فبالتالي الاطفال يطلعوا ميعرفوش الحرام و العيب
انا شايفه ان الحل الوحيد هو تاسيس اولادنا علي الاخلاق و الدين و نرجع ماده لدين بدور كبير في المدارس صدقني لا محتاجين قانون و لا شيء

معلش طولت عليك بس اصل بقالك كتير مبتكتبش فقلت اعوض كل اللي انت مكتبتهوش
متغيبش كتير علينا
تقبل مروري

قلب ينبض لله يقول...

التحرش الجنسي دا من أقذر واسمحيلي أقولك أقذر الحاجات اللي ممكن البنت تتعرضلها
بجد بحش أننا بنضيع كشعب أخلاقه بتوه منه
هو الموضوع دا زيادة شوية في القاهرة
انما في الأقاليم قليل نوعا ما

وعلشان أوضح بس أنا الحمد لله ما اتعرضتش للتحرش دا
بس بيركبني ستين عفريت لما بسمع عنه وببئي عاوزة الناس اللي بيعملوا كدا يتجلدوا بالكرباج

بوست جميل ياقمر تسلمي

M.a.r.y.o.o.o.m يقول...

إنما الأمم الأخلاق ما بقيت

كلام على بلاطة يقول...

طبعا اسلوب المعاكسات اسلب غير متحضر
لكن علىة البنت ان تكون محتشمة قولا وفعلا ولبسا
تحياتى

oRiGiNaL HeArT يقول...

والله السبب البنات والولاد مع بعض
بس مش كلهم بس اللى بعدو عن الدين
ودول للاسف بقوا كتير اوى
ربنا يهدى شباب الامة ويحفظهم
ويبعدهم عن السلوكيات السيئة دى

نونو يقول...

انا جيييييييييييييييييييييييت
طبعا المدونة نورت
طبعا لية وحشة
بس اية الجمدان دة
حلو اوى الموضوع دة بجد
واسلوبك فيةحلو اوى
اعجبنى جدااااااااااااااااااااا
على فكرة السلبية هى الى لازم تتعالج
والله شباب ويشوفوا المنظر المهين
وبدل مايعملوة حاجة
بيشجعوة
سلبية ثم سسلبية ثم سلبية
افتكرتك فى محطة الرمل وسلمتلك على البحر والقلعة
وكل حاجة
سلام

في حب مصر يقول...

عاشقة الجنة
أولا انتي فعلا بتنوري المدونة والله..ويارب تفضلي كدة تنوريها على طول.
هي فعلا أزمة أخلاق وضمير.. بس مش لازم نعلق الغلط كله على البنات.. احنا وصلنا لمرحلة خطيرة جدا أخلاقيا..
اتمنى فعلا اننا نخرج من الحالة دي.. ونقرب من ربنا بجد..
شكرا لمرورك وتعليقك ودايما منوراني

في حب مصر يقول...

قلب ينبض لله
أولا أنا مذكر مش مؤنث .. بس أنا بتفق معاكي في كل اللي قولتيه.. وعلى فكرة هو قليل في الأقاليم فعلا.. بس لو سكتنا هينتشر زي الوباء في البلد كلها.
منوراني

في حب مصر يقول...

مريم

يااااااااااه كل ده تعليق.. واضح ان السكريرة الحسناء بتاعتنا مش فاضية اليومين دول.. معاكي ربنا يا أم الضفاير..

تحياتي

في حب مصر يقول...

على بلاطة

هو مش بس مش متحضر ده من الأساليب القذرة للاسف.. متفق معاك ان البنات لازم تلتزم في لبسها.. لكن مش ده السبب الوحيد لانتشار التحرش في مصر..

شكرا لمرورك وتعليقك

في حب مصر يقول...

original heart
فعلا السبب مشترك.. وبعد الشباب عن الدين عامل مهم.. لكن الحل لازم يكون أمني دلوقت..

تحياتي وشكرا لمرورك وتعليقك

في حب مصر يقول...

نونو

حمدلله على سلامة سموك
بالتاكيد المدونة نورت
وبالتأكيد ليكي وحشة
وبالتأكيد أن فرحان انك سلمتيلي على البحر والقلعة..
بس ليه افتكرتيني في محطة الرمل.. مش عند القلعة مثلا؟؟هههههههههه

حمد لله على السلامة مرة تاني
ونورتيني يا قمر

سنووايت يقول...

احنا كدة هنحتاج قوانين كتير اوي
عايزين بقي قانون داخل المنازل يعاقب الاهالي علي اهمالهم وقانون يعاقب الام عن سلوكيات غلط بتعلمها لولادها وقانون علشان الالفاظ اللي بيستخدمها لبعض عادي

انا كان عندي اقتراح علشان مشكلة المعاكسات والتحرش دي وهي ان يكون فيه عسكري في كل شارع في مصر زي عساكر زمان "مين هناك" واي معاكسة يكون ليه عقوبة حتي ولو بالكلام بس قالولي انتي بتقولي ايه دا حتي العساكر بقوا يعاكسوا دلوقتي
فعلا ملناش غير ربنا

غير معرف يقول...

مشكلة صعبة وبشعة جدا .. يا ريت نحترم نفسنا ونحافظ عليها بمحافظتنا على من حولنا

تحياتي

Empress appy يقول...

ههههههههه اسكت الا الرجاله الكبيرة طيب دههتقوله احترم نفسك ازاى لااااا دى بقت مشكله والله بجد

غير معرف يقول...

لو كل واحد احترم نفسه فعلا وعارف ان اللي هيعملوا بره مع بنات الناس هيحصل لاخته او ماماته او او مراته او بنته اكيد هيفكر الف مبرة قبل ما يقدم على اي فعل زي ده

تحياتي وربنا يهديهم بجد

نونو يقول...

رمضااااااااااان كريم
يارب يكون احلى رمضان هيعدى علينا
كل سنة وانت طييييييييب

Unknown يقول...

مهما الامن عمل ومهما القوانين ردعت احنا محتاجين تغيير ثقافة شعب و اخلاق ناس فقدوا ادميتهم...عليه العوض

في حب مصر يقول...

سنووايت

احنا فعلا عايزين تغيير كامل في ثقافتنا.. وعايزين قوانين كتييييير قوي في البيت والمدرسة والشارع .. وبما ان مش هنقدر نعمل كل القوانين دي.. ومش هنقدر نغير ثقافة مجتمع بتتجه فعلا ناحية الانحلال.. فمتهيألي لازم نبدأ بقوانين تردع الناس في الشارع

متفق معاكي ان رجال الامن نفسهم بقم محتاجين تأهيل.. وانهم هما نفسهم اللي بيعتدو على القوانين.. بس لازم يكون فيه وقفة مع كل ده.. مش ينفع خالص نسيب الامور تتجه ناحية الانحلال الكامل.

تحياتي ودايما منوراني

في حب مصر يقول...

على الطريق

يااااااااه اخيرا ظهرتي... كنتي فين كل ده...
ياريت فعلا نقدر نحترم نفسنا.. بس ده مش هيجي من نفسه.. لازم يكون فيه رادع

تحياتي

في حب مصر يقول...

آبي

الرجالة الكبيرة دي سيبك منها... دول بيلعبوا في الوقت الضايع.. وبعدين دولة قلة قليلة مش كلهم الحمد لله..

منوراني سموك

في حب مصر يقول...

أيامنا الحلوة

معاكي حق طبعا.. بس للاسف مفيش حد بيفكر بالمنطق ده دلوقت... دايما بنفكر بمنطق مختلف ومش بنتوقع او بنصدق ان اللي بنعملة ممكن يتردلنا احنا..
ربنا يتولانا برحمته

تحياتي ودايما منوراني يا قمر

في حب مصر يقول...

نونو

وانتي طيبة يا قمر.. ويعود عليكي الايام دي بالخير والسعادة

تحياتي

في حب مصر يقول...

إنجي

عند حق.. احنا محتاجين تغيير ثقافة شعب بالكامل.. محتاجين ثورة مجتمعية.. بس ده مش هيحصل لوحدة من غير ما نتحرك ونعلاج السلبيات

تحياتي ودايما منوراني

Unknown يقول...

اسجل اول مرور بمدونتك ولا اخفى اعجابى بمحتواها
انت عارف اخى العزيز مشكلتنا اية؟مشكلتنا هى مشكلة غياب الاخلاق اولا واخيرا وانا بصفتى اعمل مع اجانب ومنغمس فى وسطهم اقولك انهم ناس بتحترم نفسها اولا قبل احترام القانون وميعرفوش الفتاكة والفهلوة وامثال ذلك...
تحياتى

Unknown يقول...

والله لو اننا تحلينا بخلق الاسلام
اوحتى عادات الشرق لما كانت تلك الظاهرة القبيحة انتشرت
او لو ان الرجل او الشاب يعامل المرأة
على انها امة او اختة او حتى بنت حتة ماكانت انتشرت لكن اقول اية مفيش اخلاق



كل عام وانت بخير
رمضان كريم

كلام على بلاطة يقول...

كل ده ناتج عن الثقافة المغلوطةفى المجتمع ولا بد من تصحيح المفاهيم لدى النشأ
تحياتى

نونو يقول...

انا جيت اسلم قبل ما اروح المعتقل
رمضان كريم
كل سنة وانت طيب

nody يقول...

انا قلت استنى لحد ما اشوف الاراء
بص طول ما احنا بنعلق الانحلال الاخلاقى على لبس البنت
وبنجلد الانثى لوحدها
ها نفضل فى الاسفاف ده واكتر كمان

لان ده اسمه تخلف وجهل
وانتظر بوست عاندى من وجهه نظر انثى فى الموضوع ده

سلام

في حب مصر يقول...

medus
بداية أحب أرحب بيك في أول زيارة لمدونتي المتواضعه واشناء الله مش تكون الأخيرة؟
مش معنى الكلام ده ان الاجانب محترمين بطبيعتهم واحنا غير كدة.. بس الحكاية ببساطة انهم اتعودوا يعيشوا في بيئة يحكمها القانون، أما القانون بتاعنا والأمن اللي عندنا مش قادر يخلق البيئة القانونية والامنية المناسبة اللي تجبر الناس تتعود عليها
مش معنى كدة طبعا ان الاخلاق بتاعتنا مثالية.. للأسف هي زي كل حاجة في بلدنا بقت في انحدار
تحياتي ودايما منورني انشاء الله

في حب مصر يقول...

نهر الحب

بالتأكيد كلامك صحيح.. بس لحد ما ده يحصل لازم يكون فيه ردع للناس وعقاب على السلوكيات الفاسدة..

كل سنة وسموك طيبة بمناسبة رمضان وربنا يعود الأيام عليكي بالخير

تحياتي

في حب مصر يقول...

كلام على بلاطة
تصحيح الثقافة لدى النشا.. كلمة كبيرة قوي وتحتاج سنيين طويلة علشان تتم.. احنا بقينا عايزين إجراءات عاجلة للاسف لوقف الانحدار الاخلاقي ده

تحياتي ودايما منورني

في حب مصر يقول...

نونو

فيكي الخير والله دايما بتسألي وتسلمي..
معاكي ربنا في المعتقل
وكل سنة وانتي طيبة بمناسبة رمضان

في حب مصر يقول...

نودي

فعلا مسك الختام يا أميرة المنصورة.
على فكرة انا من البداية قولت ان الانسان محترم محترم مهما كان لبس البنت.. المشكلة مش لبس البنات بالتأكيد.. المشكلة ان فيه انحدار أخلاقي دلوقت.. لكن لازم برضه نقول ان فيه بعض البنات اللي سلوكياتهم فاسدة وبتشجع على انتشار الظاهرة دي للأسف..

في انتظار وجهة نظر سموك في الموضوع

تحياتي