من ساعة ما رجعت من الأجازة في أول سبتمبر اللي فات وأنا بفكر جدياً أجيب عربية
انتو عارفين طبعا (أو حتى لو مش عارفين مش مشكلة أديكم بتعرفوا) أن أبوظبي بقت زحمة قوي وعلشان الواحد يقدر يحصل تاكسي بقت عملية صعبة والجو حر ما يقدرش يستنى كتير
وبعد تفكير عميق قررت أتعلم السواقة، وبما إني هابدأ من الصفر كان لازم أدخل مدرسة المرور في أبوظبي
ورحت فعلا فتحت ملف في المرور ودفعت حوالي 2500 درهم (حوالي 4000 جنيه مصري) وبدأت التدريب الممل
وبعد خمس شهور وصلت أخيراً لأول اختبار كان مفروض يتعمل في المدرسة قبل ما أخرج أتدرب في الشارع
النهاردة كان ميعاد الامتحان، وفعلاً دخلت وكان الامتحان سهل جدا عبارة عن ازاي تقف بالعربية في الباركن بشكل صحيح
وكانت النتيجة!!
صدمة!!!
أنا سقطت يا مينز!!!
ما استوعبتش اللي حصل..
قولت يمكن دي كدبة إبريل باعتبار النهاردة أول إبريل
ازاي واحد زيي كدة: عبقري، عظيم، ذكي، متميز يسقط!!
يا فضيحتك يا طنط فكيهة!!!!
وبعد ما فقت من الصدمة.. افتكرت البوست الأخير بتاعي اللي عن الايمان بالقضاء والقدر.. قولت الحمد لله
المفروض اني أعيد الامتحان قريب.. بس أنا بفكر بصراحة أجيب عربية كاروا بحمار.. أو توك توك في الأول وبعدين أتدرب على العربية
تذكرت قول الشاعر : لكل عظيم (اللي هو أنا) هفوة.. ولكل جواد كبوة
وكل سقوط وأنا طيب
هناك 32 تعليقًا:
مبروووووووك
انا سقطت ف الامتحان مرتين
قبل مااخد الرخصه بواسطه
عمار يالوبياااااا
لكن مصاريف المدرسه 4000 جنيه
ايه يابنى دول عندنا مصاريف المدرسه وتطلع الرخصه كمان معاها ب 450 جنيه
وهو امتحان واحد بعد 13 طلعه كل طلعه ساعه
هو انتو عندكم امتحان ع كل جزء ولا ايه
هما فكرينهم بيعلموا سواقة طيارات مش عربيات
ربنا يكون ف عووووووونك
وبعدين حرااااام ازاى اول امتحان
يكون عن اصعب حاجه
ده الركن ده اصعب م السواقه ذات نفسها
د. أجدع بنوتة
الله يبارك فيكي يا ياسمين
انتم السابقون ونحن اللاحقون
انتي قدرتي تاخدي الرخصة باللوبيا بس أنا أعمل ايه طيب مفيش هنا لوبيا ولا كوسة ولا ملوخية ولا بامية ولا أي خضار؟
تقريبا هما عارفين كدة حكاية اللوبيا علشان كدة مش بيعترفوا بأي رخصة مصرية ولا رخصة أي دولة عربية كمان، بيعترفوا بس برخصة الدول الكبرى وبيغيروها مباشرة
على فكرة المبلغ مش بس 2500 درهم (4000 جنيه مصري) لا دي كانت البداية لكن المبلغ كله يمكن يوصل في النهاية 5000 درهم يعني أكثر من 7000 جنيه مصري.. شوفتي الرخصة الحصول عليها سهل ازاي؟؟؟؟؟؟؟؟ يلا علشان هنعمل حملة تبرعات قريب؟؟؟؟؟؟؟؟؟
متشكرين يا ستي على مشاركتك الجميلة وكل سنة وانتي طيبة كمان مرة بمناسبة بلوغك سن الرشد.
ودايما منوراني يا أجدع بنوتة
ألف مبرووووك فرحتلك من قلبي
لولولوووووووووووووي
كدة من أول امتحان تسقط
وعمال تقولي عظيم وعبقري وذكي ههههههههههههه أمال لو مكنتش كدى كنت عملت ايه
ولا يهمك ما يقع غير الشاطر
وبعدين ايه الفلوس دي كلها .. كل ده علشان الرخصة بس أمال العربية بكام بقى؟؟؟؟؟؟؟
عايز نصيحتي، انت عارف اني بعزك قوي.. اشتري توك توك وريح دماغك؟؟؟؟؟؟؟؟؟؟؟؟
سماح
ايه ياعم هان عليك تدفع 4000 علشان تتعلم سواقة لا يعم دول عندنا يشتروا عربية ولو حطيت عليهم شوية قدهم يجبولك حاجة معتبرة يعنى الاولانية سيات والتانية ممكن تبقى 128 على قد الحال بس مش اتعلم بيهم
سماح
فرحانة اني سقطت يعني
يا فرحة طنط فكيهة فيا؟؟؟؟؟؟؟؟؟؟؟؟؟؟؟؟؟؟؟؟؟؟؟؟
بس خلي بالك سقوطي مش معناه اني مش عبقري وذكي ومتميز.. أكيد فيه خلل في نظام الامتحان نفسه. ههههههههههه
وبما اني عارف معزتي عندك شكلها ايه فأنا هاسمع نصيحتك وهاشتري توك توك بس اعملي حسابك علشان أوصلك بيه
وشكراً على تعليقلك وفرحتك فيا..ههههه ودايما منوراني يا سمسمة
همس الحياة
منوراني يا صعيدية
الفلوس دي مش كل المبلغ احتمال المبلغ الإجمالي يوصل ل 7000 جنيه؟؟؟؟؟؟؟؟؟؟؟؟؟؟
طيب اذا كانت العربيات رخيصة كدة عندكم فياريت تشوفيلي عربية حالتها كويسة لما أرجع..
وشكرا على تعليقك
هههههههههههههههههههههههههه
والله الحمد لله انا عبقريه تعالى اعلمك انا طلعت الرخصه قبل الامتخان بس امتحنت والله طلعت الكوبري ونزلت هههههههه
تعالى اعلمك او فكرة التوك توك حلوه انصحك بيها لانه سهل انك توقفه طلع رجلك بره وهو هيقف
(سلام مربع للساقطين )تن ترراارن تن تن اللى بيعلقوا اخطأهم على شماعه الاخرين وقاااااااال ايه بيقول عظيم هههه (العظمه لله وحده)ياسى ساقط وعلى العموم ما تزعليش ياست فكيهه وعلى العموم اقدم لك نصيحه غاليه الثمن لا تقدر بمال العربيه ولاالدنيا كلها(ليس المهم ان تنجح فى قيادة عربيه المهم ان تنجح فى قيادةنفسك دى اهم حاجه)فهمت ياسى (س)واتمنى لك النجاح فى قيادة نفسك ثم العربيه
آبي
أنا عن نفسي مستعد تمام الاستعداد ان انتي تعلميني بس اوعي ترجعي في كلامك
حكاية انك تاخدي الرخصة وبعدين تمتحني في مصر عادية جدا . ده فيع ناس بتاخدها من غير لا امتحانات ولا كوبري ولا غيره. عادي انتي في مصر؛ حيث الفساد متغلغل في كل شيء
انا برضة بقول اني اجيب توك توك احسن أهو الواحد لو اتزنق ممكن يشتغل عليه ويكسب. ههههههههه
بس اوعي تكوني ركبتي توك توك؟؟؟؟؟؟؟؟؟؟
منوراني دايما والله
غير معروف
انت باين عليك فرحان قوي لأني سقطت!!!! هههههههه
عامة السجن قصدي السقوط للجدعان
بس ياريت لو كنت عرفتيني انت مين
ومع ذلك منورني دايما
ياللهوى على الفال
دا انا على وش نتيجه الترم الاول لليسانس
الاقى اول كلمه سقطت
هالاقيها منك ولا من دكتور فن القص
ولا من علم الدلاله
ربنا ينجحك ياسيدى
وانا معاك
فعلا فعلا....لكل عظيم هفوة....اما بالنسبة لحكاية الكارو دي..بصراحة مع حضرتك فيها....لكن بالنيبة للتكتك فنصيحتي بلاش..لحسن ييجوا بعد شوية ويسحبوا منك الرخص...
ان شاء الله بالنجاح المرة اللي جاية
لالالالالالالالالا
بقى كده برضه
داحنا بنقول المصريين جدعان
بس على فكره العيب مش فيك
العيب فيهم
عارفين انك مصرى وبيرحبوا بيك
ولا يهمك التكرار بيعلم الشطار
ان شاء الله هتنجح وتاخد الرخصه وتجيب العربيه كمان
بس اوعى تنسى تاخدنى بيها لفه
مانا مش هدعيلك كده ببلاش ... ولا ايه؟
وبعدين مين قالك انى مش بزور مدونتك
انا النهارده كنت خلاص دالخه اقولك انت مش بتكتب حاجه جديده ليه
بس انت سبقتنى عمرك اطول من عمرى
:)
قولى بقى الامتحان الجاى امتى عشان اكثف الدعاء
:)
سلام يا مصرى يا غلبان
هههههههههههههههههههههههههه
ما يقع إلا الشاطر وكمان الله يطمنك جامد بفكر أعمل الرخصه كمان شهر ولا حاجه لما أخلص إمتحان بس إدعيلي بس هنا بقي علي عكسكوا كل حاجه بالكوسه
nody_1987
منوراني والله يا نودي
وبعدين ليسانس،وفن القص، وعلم الدلاله انتي في كلية ايه بالظبط؟؟؟؟؟؟؟؟؟؟؟؟
ومع ذلك يا ستي ما تخافيش فيه فرق بين امتحانات السواقة وامتحانات التعليم، أنا معاي بكالريوس بتقدير جيد جدا مع مرتبة الشرف، يلا شدي حيلك علشان يكون عندكة التقدير ده انتي كمان او احسن منه
ربنا ينجحك يا رب
بس قوليلي انتي في كلية ايه الاول
ودايما منوراني
دواير
شكرا يا إسراء على تعليقك الجميل
ومنوراني دايما يا أسيوطية
وبعدين انتي خايفة احسن يسحبوا رخصة التوك توك ولا التوك توك نفسه، وهو من امتى كان التوك توك بيترخص انا اعرف انه مش بيترخص، يمكن الامور اتغيرت
بس انا هاسمع كلامك وأجيب كاروا بحمار
ويارب تنجحي كدة وتبقى دكتور صيدلانية قد الدنيا بس شدي حيلك
منوراني بجد
دكتورة بندقة
منوراني بجد والله
وما تخافيش انتي بس ادعيلي انجح واخد الرخصة وليكي عليا أديكي العربية اسبوع مجانا.
أنا برضة بقول ان العيب مش فيا، أصل ما ينفعش أسقط، دي أول مرة ادخل في حاجة واسقط!!!!!!!!! أكيد العيب في النظااااام. هههههههه
على فكرة انا دايما الحمد لله ربنا ساترها معايا، في الثانوية العامة كنت من أوائل المحافظة، وفي كلية الاقتصاد والعلوم السياسية كنت من أوائل الدفعة برضه بتقدير جيد جدا مع مرتبة الشرف، وده أول سقوط ليا، أنا خلاص قررت اجيب توك توك وأمري لله
منوراني يا بندقة
وهاقولك على معاد الامتحان لما يتحدد انشاء الله
مريم
ربنا يخليكي يا رب
ومتخافيش الرخصة في مصر سهلة جدا مش محتاجة لا امتحانات ولا حتى انك تعرفي تسوقي، هي ابلكوسة والفلوس تكون عندك
ربنا ينجحك يا ستي وينجحني انا كمان
ههههههههههههههه على فكرة انا اتخضيت ، بحسبك لا قدر الله سقطت فى الكلية ولا حاجة .. يا سيدى تتعوض ان شاء الله ، عارف هما برة مش بيدوا الشهادة باللوبيا ليه ؟؟ علشان ارواح البنى آدمين ليها قيمة عندهم .. لكن عندنا عايزين يخفوا الزيادة السكانية ..
ايه يا عم الناس كلها فرحانة فيك كدة ليه وعمالين يباركولك..ههههههههههههههههه
ولا يهمك انا زعلانة جدا ليك، وبدعيلك من قلبي انك تنجح المرة الجاية.
بس اوعى تكسفني قدام صحابي !!! هههه
وانت ما قولتليش بجد، ناوي تجيب عربية ليه، انت هتبلط عندك ولا حاجة؟
سارورة
لا يا ستي متخافيش انا مكنتش فاشل كدة في دراستي
الحمد لله كنت دايما من الاوائل من اولى ابتدائي لغاية ما اتخرجت من الجامعة، بس باين هخيب في تعلم السواقة.!!
انا عن نفسي شايف ان التشدد احسن كتير من الكوسة، لان دي ارواح ناس زي ما قولتي
ماعمة سموك نورتيني
وشكرا على تعليقك
سماح
لا وانا ما يرضينيش زعلك برضة؟؟ علشان امتحان في السواقة تزعلي.. لا لا لا.. يا شيخة هي شهادة بكالريوس، كبري دماغك، والجايات اكتر.. مش السقوط طبعا. هههههههه
انا عايز اجيب عربية بس علشان البهدلة هنا، لان مفيش مواصلات سهلة دلوقت.. اعمل ايه مجبر لا فنجري. ههههههههه
نورتيني مرة تانية يا سمسمة
أيوة ..على فكرة التوكتوك بيترخص..ايه حضرتك ماسمعتش عن مشكلة اصحاب تكاتك الجيزة اللي سحبه منهم الرخص بتاعتهم..عشان كده انا قلتلك بلاش تكتك..وقضيها كارو أحسن...والحمير مافيش أكتر منها اليومين دول...بس انتو عندكو حمير برضه في الامارات...!!!
السلام عليكم ورحمة الله
سعدت جدا بزيارة حضرتك لمدونتي المتواضعة وارجو دوام التواصل
موضوعك بقى
انا بتعلم سواقة لسة ياترى يا هل ترى هيعذبوني في الرخصة وهنعملها باللوبيا نخوض التجربة فكرك ولا نقصر ونشوف اللوبيا وبلاش وجع قلب؟؟
للاسف الشديد انا من الناس اللي حكاية اللوبيا دي لو اتضرتني الظروف لها بكون استنفذت كافة طرقي الحلال الاول وبلجا لها على مضد
حضرتك بقى بعد الفلوس دي كلها وكمان التعب النفسي هترسي برضه على لوبيا ولا ايه؟؟
انا شايفة ان حضرتك ممكن تجيب صفيحة وتثبتها على اربع عجلات وتكتب عليها عربية اوفر
احتمال اعمل كدة ولا هيطلعولنا لها ترخيص؟؟1!!!
عذرا للاطالة
وتحياتي لحضرتك
دواير
يعني حتى التوك توك محتاج ترخيص يا صعيدية، كدة زعلتيني بصراحة؟؟
خلاص هاعمل ايه هاجيب عربية كاروا، بس المشكلة ان هنا في الإمارات مفيش حمير خالص.. قوليلي بقى أعمل؟؟
انا من ساعة ما جيت ما شفتش اي نوع من الحيوانات غير الكلاب.. الآليفة طبعا اللي الناس بتربيها.. نجيب منين حمير علشان الكاروا؟؟؟؟؟
منوراني كمان مرة
nonoymm
منوراني في اول زيارة ليا ويارب دايما كدة
في مصر مفيش حاجة دلوقت اسمها طرق حلال.. فيه حاجة وحدة بس.. الكوسة.. واللوبيا
الا بالمناسبة هي اسعار الكوسة كام دلوقت في مصر
حلوة حكاية الصفيحة دي، بس لما انزل مصر ابقى تحاول تطبيقها
منوراني كمان مرة
دي أخرتها بردو بلدك الحبيبة مصر نفسها ترفع راسها عشان تفتخر بيك وتقول ابني نجح في السواقة وانت تخزلها كده .... يعني ترجع لنا من بلاد بره وانت ساقط بدل ما كنت ترجع لنا ناجح وفي ايدك كوتش العربية .... لالالالالالا مكنش العشم
يارب تنجح وترفع راس بلدك انت املها الوحيد بعد اللي بيحصل فيها
بس بجد سعيدة ان روح المرح ابتدت تدخل مدونتك ويارب دايما وربنا يصلح لك الحال
وشكرا لسؤالك عليا متقلقش انا لسه بخير والامن مستتب
تحياتي
مدونة جميلة
وان شاء الله الامتحان القادم يكلل بالنجاح
أيامنا الحلوة
حمدلله على السلامة يا شيري ايه اخر اخبار الإضراب في مصر
بصي ما تخافيش انا سقطت اه، بس راس مصر فضلت مرفوعة؟؟؟؟؟ انا اثبتلهم قدرة المصري على عمل اللي محدش يعمله، وهو السقوط في امتحان الباركن. هههههههههههه
وربنا يخليكي
ودايما منوارني
وايامك حلوة
أحمد العجوز
شكرا على مرورك الكريم
وتشريف مدونتي بالتعليق
ودايما منورني
ياللا معلش ..تعيش و تاخد غيرها ..
لا لا لا ..انا بهزر ..ان شاء الله ميكونش فى غيرها ..
عربية كارو ايه ..انت ان شاء الله تجيب المرشيدش (بالشين ) ..
تحياتى ليك
سمر
ربنا يكرمك يا رب
وانشاء الله يا ستي اجيب المرشيدش علشان ما تزعليش
بس دعواتك معايا
شكرا على تعليقك
ومنوراني دايما
إرسال تعليق