إشارة حمرا

السلام عليكم.. أولاً وقبل كل شيء أحب أشكر كل المدونين الحلوين والمحترمين اللي سألو عن سبب تأخري في الكتابة خلال الفترة اللي فاتت، وأحب أعرفهم اني الحمد لله لسة عايش حر وسليم، مفيش اغتيالات ولا عمليات خطف ولا محاولات اعتقال تمت لغاية دلوقت.. بس كانت شوية مشاغل كدة على شوية احباطات وسدة نفس ربنا ما يحكم على حد...

*****

انتو فاكرين طبعا حكاية سقوطي في امتحان الرويس والباركن بتاع مدرسة السواقة.. أنا كنت نسيت أقولكم اني دخلت الامتحان مرة تاني ونجحت بجدارة الحمد لله.. وكلمة بجدارة دي موجهة للقلة المندسة اللي اتريقت عليا وشمتت فيا ههههههههه.. المهم ان إدارة المرور حددت يوم 15 يوليو كامتحان نهائي في الشارع علشان الرخصة وسلموني بطاقة تدريب علشان اتدرب عند مدرسة خاصة على السواقة في الشارع قبل الامتحان.. وسألت بعض أصحابي هنا عن مدربين كويسين في السواقة.. فدلوني على اتنين.. اتصلت بالأول واتفقت معاه نبدأ يوم الأحد اللي فات بس الراجل قالي ابقى اتصل أكد علي قبل الميعاد بنص ساعة.. وجيت قبل الميعا باتصل بالراجل لقيته في الشرطة لأن العربية اللي بيدرب عليها عملت حادثة.. قولت الحمد لله انها مش من نصيبي انا الحادثة دي.. اتصلت بالتاني وحددت معاه ميعاد وبنفس المنطق طلب اني أكد الميعاد قبلها.. اتصلت بالراجل اعتذر وطلب تأجيل الميعاد اسبوع.. ليه يا عم الحج.. قال علشان في وحدة معرفته لبنانية هتمتحن في يونيو ومستعجلة.. الراجل بصراحة عنده حق دي بنت مش خنشور زي أنا كدة.. وبعدين لبنانية يعني نانسي وهيفا وانتو عارفين بقى..

****

المهم اني اتفقت مع مدرب تالت، سوري ضخم الجثة عريض المنكبين شلولح ... وأخيرا التزم وجه النهاردة الصبح وبدأت التدريب على السواقة في الشارع ... أول ما ركبت وظبطت المرايات وربطت حزام الأمان.. الراجل قالي يلا اطلع سيدا (سيدا دي معناها على طول يعني من غير ما تروح يمين ولا شمال).. سمعت الكلام وطلعت سيدا.. ما هو انا لو ما مش سمعت الكلام بالذوق هاسمعة بطرق تاني.. ههههههه.. وبعدين لقيت الراجل بيقولي انت لازم تشيك في المرايات التلاتة باستمرار اللي على اليمين واللي على الشمال واللي في النص.. قولتلة ازاي يعني أبص على المرايات واسيب الطريق قدامي.. الراجل بصلي بنظرة شرز.. قولتله حاضر.. وفضلت لاوح رقبتي على المرايات والطريق لمدة ساعة.. وطلعت بالعربية على الطريق السريع والراجل طلب اني اسوق على 120 كلم/س وبصراحة كانت السواقة بالسرعة العالية دي ممتعة.. لغاية ما لقيت المدرب راح دايس على الفرامل اللي عنده مرة واحدة وانا اتخضيت.. هو فيه ايه.. بصلي وقال انت مش شايف الإشارة الحمرا قدامك.... آه والله ده فيه اشارة حمرا أهي بجد؟؟؟؟؟ أنا طبعا قولت خلاص مفيش فايدة .. بس الراجل طمني وقال لا ده عادي ده لسة أول درس وانت احسن من غيرك كتيير.. قولت الحمد لله لسه فيه أمل.. المهم محدش يشمت بعدة كدة.. ههههههه

عميل أمريكاني

رغم اني مش بحب أتكلم عن شغلي أو اللي بيحصل فيه، لكن معلش هاضطر أكسر القاعدة المرة دي لأن الموقف اللي حصل يستحق نكسر القاعدة علشانه، الموضوع باختصار اني كنت بتفرج على بعض القنوات الإخبارية في التليفزيون وبتابع اللي بيحصل في لبنان، واستفزني جدا اللي شوفته خاصة من حزب الله اللبناني اللي قواته وميليشياته احتلت بيروت وقطعت الطرق باستخدام السلاح، ورغم اني كنت يوم أجازة من الشغل لكني قررت أكتب موضوع عن الأحداث دي كلها، وطبعا الموضوع كان كله انتقادات لحزب الله، قولت فيه ان السلاح بتاعه فقد الشرعية وانه مبقاش سلاح مقاومة وان قواته بقت عاملة زي الميليشيات اللي في العراق..إلخ. والموضوع اتنشر على موقع المؤسسة اللي انا بشتغل فيها.

****

المهم بعد دقايق من نشر الموضوع اتصل واحد زميل لي في الشغل (باحث لبناني في الإدارة الاستراتيجية) وأبدى إعجاب غير طبيعي بالموضوع وعرض انه ياخد الموضوع معاه البيت يسهر عليه ويترجمة علشان يتنشر على الصفحة الانجليزية للموقع بسرعة، وفعلا اخد الموضوع وترجمه واتنشر تاني يوم. وبعد ما رجعت البيت اتصل زميل تاني انتقد الموضوع وقال إنه أسوأ موضوع انا كتبته من يوم ما جيت هنا، واتهمني بعدم الموضوعية والانحياز ضد حزب الله اللي بيدافع عن كرامة العرب والمسلمين، واني بكرر نفس كلام أمريكا وإسرائيل اللي عايزين يدمروا الحزب.. قلت عادي كل واحد شايف الموضوع من زاويته هو .. وبعدين اتصل كذا واحد وقالوا رأيهم وكانو طبعا منقسمين واحد مؤيد والتاني معارض حسب موقف كل واحد من حزب الله وإيران.

****

لكن الغريب بقى ان أحد زملائي في العمل وهو باحث برضه بس كبير في السن (فوق الخمسين سنة) حذرني وقال: انت كدة دخلت عش الدبابير ومش بعيد تتعرض للاستهداف من حزب الله وإيران، وممكن يعتبروك عميل أمريكي!!!! (يا نهار مش فايت هي وصلت للقتل والعمالة ههههههه) طبعا أنا ضحكت جدا وعدى الموضوع..

****

تاني يوم وانا في الشغل جالي تليفون من واحد قال انه تبع السفارة الاسترالية وقال ان نائبة السفير الاسترالي في أبوظبي عزماني على فنجان قهوة في اي وقت أنا أحدده علشان تتناقش معايا في الموضوع... أنا سألته هو فيه ايه بالظبط.. قال انها قرت الموضوع بتاع لبنان وعجبها وعايزة تتناقش معاك فيه!!! انا طبعا اعتذرت وقولتله انا مقدرش اجتمع مع أي حد على مستوى رسمي الا بعد موافقة المؤسسة اللي انا فيها وحولته على المسؤولين عني علشان يتفاهموا مع بعض.. المهم لما الباحث زميلي ده عرف حكاية السفارة اعتبرها دليل على مساعي السفارة الاسترالية (ومن وراها الأمريكية) لتجنيدي لحسابهم..ههههههههه.. وفيه واحد تاني تفتق ذهنه عن خطر كبير وهو ان السفارة الايرانية في الامارات ممكن تاخد بالها وتقرأ الموضوع ويحطوني في دماغهم، وانتو بقى عارفين يعني ايه أحمدي نجاد يحطني في دماغه..هههههههه

****

أنا بحكي القصة دي كلها بصراحة علشان أوضح حاجة صغيرة هي ان ازاي الناس (وخاصة المصريين) بيحبوا يضخموا الأمور ويحطو سيناريوهات مستحيلة وبيصدقوها.. وازاي كمان انهم مش بيتقبلو الرأي الآخر، جايز انا عندي رأي مختلف عن رأي أي حد .. عادي جدا.. وكمان مش معنى ان رأيي يتفق مع رأي أمريكا أو استراليا في بعض المواقف يبقى خلاص بقيت بعبر عنهم وعميل ليهم بالعكس انا كتبت موضوعات كتير عن أمريكا وكلها تقريبا انتقادات وشتايم ليها ولسياستها.. الموضوع باختصار مسألة رأي جايز يكون صح وجايز يكون غلط.. لكنه مش عمالة ولا تخوين طبعا..ههههههههههههههه..

***

مهلبيات

ثمة كثير من الأحداث والمواقف التي نشهدها أو نسمعها ولا يمكن تفسيرها بالمنطق أو العقل، لكنها تكشف بوضوح مدى التخبط والارتجالية التي أصبحنا نعيشها، لذا لم أجد غير كلمة "مهلبيات" لوصفها، ومن هذه المهلبيات مثلاً:

* إدراج اسم أحد أعضاء الحزب الوطني ضمن كشوف الفائزين بالتزكية لمجلس محلي ميت غمر في حين أن اسمه لم يكن أصلاً ضمن كشوف المرشحين النهائية. وهذا طبعاً إنجاز غير مسبوق، فلم نسمع في تاريخ إجراء أي انتخابات في أي دولة من دول العالم كله عن فوز مواطن لم يرشح نفسه ولم يزكه أحد؟، ولكنها بركات الحزب الوطني!!

* نجاح مرشح "ميت" في انتخابات محليات دمياط؛ حيث حقق «المرحوم» محمد السيد أبورجب انتصاراً كاسحاً في انتخابات المجالس المحلية في قرية ضرغام التابعة لمركز دمياط .. واستطاع أن يحقق أعلي الأصوات بالدائرة، متفوقاً علي منافسيه من الأحياء علي الرغم من وفاته قبل إجراء الانتخابات بيومين!!

* فجأة ومن دون مقدمات، صدر قرار جمهوري بإنشاء محافظتين جديدتين في مصر، محافظة حلوان ومحافظة 6 أكتوبر، يعني بقينا 28 محافظة في عين العدو، الغريب إن الحدود بتاعة المحافظات اتغيرت واتعدلت أكثر من مرة بعد صدور القرار بساعات.. وده طبعا دليل على حكمة القرار ودقته.. محدش يصدق القلة المندسة اللي بتقول انه عشوائي وارتجالي ومتخبط!!.. أنا بس عايز أعرف انا دلوقت تبع أنهي محافظة!!!

* في لفتة إنسانية عظيمة قررت الحكومة المصرية تصدير الغاز الطبيعي لإسرائيل بسعر أقل من السعر العالمي بمعدل 25% وأقل من السعر المحلي بمعدل 35%، لمساعدة إسرائيل على مواصلة نموها الاقتصادي.. الغريب إن الحكومة المصرية وعلشان تعوض الخسائر بتاعتها في الصفقة دي قررت رفع الدعم عن الغاز والكهربا بالنسبة للمصانع المصرية كثيفة الطاقة، وده طبعا معناه إن أسعار المنتجات اللي بتنتجها المصانع دي، خاصة مصانع الحديد والأسمنت والألومنيوم والأسمدة، هترتفع بنسب كبيرة أكتر ما هي مولعة دلوقت، واللي هيتحمل الفرق هو احنا.. يعني باختصار الحكومة هتبيع الغاز لإسرائيل بأسعار مخفضة والفرق نتحمله احنا.. شوفتوا إنسانية وحب لإسرائيل أكتر من كدة.. متهيألي أمريكا نفسها ما بتعملش كدة.

* في نفس اليوم اللي حكم فيه القضاء العسكري على 25 من قادة الإخوان بالسجن مدد تتراوح ما بين 3 و10 سنوات، مع ان القضاء المدني برأهم قبل كدة، برأت محكمة مدنية نائب الحزب الوطني هاني سرور، اللي كان متهم في قضية توريد أكياس الدم الفاسدة.. ليه لأ مش هاني سرور عضو بارز في الحزب الوطني إزاي يتحكم عليه يعني هي فوضى.. وبعدين الراجل كان بيقدم خدمة وطنية عظيمة لمصر والمصريين.. الراجل كان بيريح المرضى بالدم الفاسد علشان يموتوا ويرتاحوا من الألم والمرض وكمان البلد تخف من السكان.. يبقى بيخدم البلد والشعب ولا لأ؟؟؟ .. وعلى رأي الشاعر.. يا مصر لو نيلك صلصلة مش هيكفي الكوسة اللي فيكي!!!!!!!!

* الإخوان المسلمين قرروا عدم المشاركة في اضراب 6 أبريل.. وبعد شوية أعلنوا مشاركتهم في إضراب 4 مايو..إيه اللي حصل خلاهم يغيروا رأيهم مش فاهم.. بس الغريب ان المشاركين في إضراب مايو أقل بكتير قوي من اللي شاركوا في إضراب إبريل.. وده دليل قاطع على التأثير الكبير للإخوان في الساحة المصرية!!.

* الريس بتاعنا كتر خيره ربنا يطول في عمره ويحكمنا 80 سنة كمان قرر منح الشعب علاوة 30%.. فالشعب قليل الأصل عمل إضراب في عيد ميلاده الثمانين.. شوفتوا شعب زي ده ياكل وينكر!!!


كفاية كدة ياريت اللي عنده مهلبيات تاني يقول عليها

أول تاج

ده أول تاج يجيلي بصراحة.. شوفته في بعض المدونات وعلقت كمان عليه .. لكنه أخيرا أصبح ملكي أنا.. جاني هديه من همس الحياة .. بنت الصعيد الجواني الجدعة، المتفتحة، الذكية .. سلام يا جدع لبنت الصعيد الجواني ولكل بنات مصر.. سلام مربع شحط محط بس من غير ضرب نار... وبما إني هاتقمص دلوقت دور الملك المتوج.. فأنا هاقول أحلى كلام وتهييس.. مش عايز حد يعارض.. مفيش ديمقراطية عندي .. أنا أتكلم وانتو تقولوا آمين حتى لو مش كنتم فاهمين .. هي دي الديمقراطية .. الديمقراطية اللي أنا أعرفها هي حكم الملك (اللي هو أنا دلوقت) للشعب من غير رضا الشعب.. الدستور هو كلامي حتى لو كل شوية اتغير.. مصلحتي الشخصية هي المصلحة العليا الوحيدة.. فلوس البلد هي فلوسي.. الهدف الأسمى إني أفضل متوج على كرسي الحكم لحد ما أموت (علشان كدة أنا ممكن ما أمررش التاج لحد تاني ههههههههه)..

سيبونا بقى من التهييس ده.. قواعد التاج بتقول إني أتبع الخطوات الآتية، وأنا هاتبعها بس علشان خاطر همس الحياة:

1ـ أذكر 10 أشياء عن نفسك:

هو صعب إن الواحد يتكلم عن نفسه، بس أعمل ايه كله يهون فدا التاج

(1) متردد كتير قوي خاصة في اتخاذ القرارات المصيرية

(2) دايما ببص للمستقبل بنظرة تشاؤمية وبقلق، رغم اني انسان ناجح في شغلي وحياتي الحمد لله، بش مش عارف ليه دايما قلقان من بكرة، يمكن لأن كل الأخبار اللي بتجيلي من مصر كئيبة أو معظمها كدة، أو يمكن يكون قلة ايمان بالله، بس دي الحقيقة

(3) كئيب، وعلشان كدة بحب الأفلام والأغاني النكدية
(4) سفسطائي، يعني ساعات أحب أجادل الناس في حاجات انا عارف إنها غلط بس لمجرد الجدل وخلاص، وساعات بيكون الهدف فتح مجالات للحوار أكتر.
(5) دماغي ناشفة، لما بقتنع بحاجة صعب أغيرها بسهولة، ولما بعاند عليه العوض..هههههه
(6) ناس كتير من اللي يعرفوني بيقولوا اني طيب، معرفش ليه طبعا
(7) كرامتي فوق كل اعتبار، ودي حاجة مهمة جدا عندي، لو حسيت في أي سلوك او كلام محاولة للمساس بكرامتي مش بسمح بيها مهما تكون النتيجة.
(8) بحب أساعد الناس مادام في استطاعتي أعمل كدة
(9) بحب أرخم في بعض الأوقات، بس على الناس اللي بعزهم واللي يعرفوني كويس، يعني الرخامة عندي دليل معزة وحب.
(10) بحب أتفرج على الأفلام والمسلسلات الرومانسية الحزينة

2/ اختر 5 أشخاص تهدى لهم التاج:
ـ أيامنا الحلوة
ـ بندقة
ـ د/ أجدع بنوتة
ـ أحيانا
ـ على الطريق

3/ لا تهدى التاج لمن أهداك اياه
ماشي يا سيدي انت تؤمر ولو ان بصراحة اللي أهداني التاج ده يستحق تاج من الألماظ

4/ أترك لصديقك الذى أهداك التاج بان التاج نزل وتعالى شوفه
بس كدة من عنيا الاتنين
......

عفريت في المطبخ

بما ان النهاردة وبكرة أجازة، فأنا قررت أطبخ زي ما بعمل كل أسبوع

نزليت صليت الظهر واشتريت الأكل اللي هاطبخة ورجعت

وبدأت الماتش بتاع الطبيخ، لكنه المرة دي كان غير طبيعي؟؟

حطيت اللحمة في المية على البوتاجاز ومعاهم بصلة صغيرة ومكعب مرقة دجاج وشوية توابل

وجبت البصل!! وآآآآه من البصل.. وبدأت أقطعه.. أنا أقطع وعنيا بتدمع.. لوما الدموع زادت في عينيا مديت ايدي وانا مش شايف طبعا علشان اجيب المناديل اللي جنبي امسح بيها الدموع دي، رحت خابط الاطباق وجايبها على الأرض؟؟

طاااااااااخ.. طااااااااااااخ.. طاااااااااااااااخ

فيه ايه؟؟؟؟

ببص على الأرض لقيت كل الأطباق اللي كانت جنبي وقعت واتكسرت حتت صغيرة؟؟!!

سيبت البصل ونزلت الم الحاجات المتكسرة دي وبعد ما خلصت رجعت للبصل تاني

وأول ضربة سكين في البصلة كانت جامدة من الغيظ على الاطباق؟؟ السكين قسمت البصلة واخدت حتة من صباعي؟؟؟

عالجت الجرح بشكل بسيط وكملت تقطيع البصل وحطيته على النار

التليفون قاعد يرن يرن، سيبت البصل على النار وخرجت اشوف مين على التليفون وقعدت ارغي لغاية ما شميت ريحة الشياط؟؟؟؟؟؟؟؟؟؟ البصل اتحرق؟؟؟؟؟؟؟؟؟

طيب وبعدين كدة الطبخة باظت؟؟؟؟؟

قولت خلاص اعمل شوية مكرونة وشربة مع اللحمة المسلوقة وبس؟؟ مفيش حل تاني

وجيت قعدت أقلب في المكرونة لغاية ما بدأت تحمر، ومسكت الحلة بتاعة الشربة واللحمة وهي بتغلي علشان احط شوية شربة على المكرونة، بس كان الدخان اللي خارج من الحلة سخن جداااا فلسع ايدي وسبت الحلة ادلقت كلها على البوتاجاز والمكرونة؟؟؟

الحمد لله اني خرجت سليم؟؟؟؟؟

سبت المطبخ وخرجت وقعدت أفكر ؟؟؟ هو فيه ايه؟؟؟؟؟؟؟؟؟؟؟

أكيد عفريت؟؟؟؟ أصل ده مش طبيعي؟؟؟؟؟؟؟؟؟

وفي النهاية غيرت هدومي ولبست ونزلت اتغديت برة؟

وراحت الطبخة كلها بعد ما اتبهدلت أنا والمطبخ؟؟؟

والسبب مجهول؟؟

على فكرة دي مش اول مرة أطبخ فيها.. بالعكس انا بطبخ حلو قوي، بس مش عارف ايه اللي كان بيحصل المرة دي؟؟

ياريت بقى لو حد عنده وصفات أكل سهلة ومفيش فيها بصل يقولي!!!!!!!!

مصر مش بخير

هل تخيل أحدكم نفسه وهو يستيقظ في الصباح ليرى أن الفوضى تعم البلد، وأن الجميع يتقاتلون لنهب ما يستطيعون نهبه؟!

هل تخيل أحدكم نفسه وهو جالس مع أسرته في بيته أن هناك من يقتحم هذا البيت ويسطوا عليه ويدمر ما فيه؟!!

من منا لم يخلد بذهنه للحظة انه ربما يتعرض وهو يسير في الشارع لسطو مسلح وربما للاعتداء؟!!!

بالتأكيد لا أحد منا يتمنى حدوث ذلك.. ولا أحد يحتمل حدوثه..

إنها فقط مجرد أفكار تراود ذهني وأنا أتابع تطورات الأوضاع في مصر

هناك من يتحدث عن ثورة جياع.. وإذا حدثت هذه فالفوضى حتما قادمة؛ لأن الجياع لا يمكن السيطرة عليهم!!

هناك من يتحدث عن انفجار متوقع في أي لحظة نتيجة تزايد معاناة الناس تحت وطأة الأسعار وغلاء المعيشة!!

الغريب أن الأمور تتفاقم.. والحكومة لا تحرك ساكناً.. إنك لا تشعر أن هناك حكومة تدير البلد وتحاول أن تتعامل مع مشكلاته.. لا تشعر بوجود الحكومة إلا من خلال قوات الأمن الكثيفة التي يتم نشرها لمواجهة الإضرابات والاعتصامات.. وهنا مكمن الخطورة، فترك الأمور تتفاقم قد يصل بها إلى مستوى لا يمكن السيطرة عليه حتى بقوات الأمن الكثيفة..

مصر ليست بخير الآن.. إنها تمر بأصعب فترات تاريخها.. والخوف كل الخوف أن يتكرر المشهد الذي رأيناه جميعاً في العاصمة العراقية يوم سقوط بغداد من عمليات نهب وسطو وتخريب، ولكن ليس كنتيجة لاحتلال خارجي وانما انفجار داخلي.. قد أكون مفرطاً في التشاؤم.. ولكن اذا استمرت مرحلة اللادولة التي نعيشها حاليا فإن كل شيء قد يكون ممكنا!!

لا أملك إلا أن أدعو الله بأن يحمي مصر.. أرض الكنانة.. وأن يحفظ أبنائها من كل سوء.. وأن يرحمنا جميعا ويلهمنا طريق الرشاد.

أنا سقطت يا مينز!!!!

من ساعة ما رجعت من الأجازة في أول سبتمبر اللي فات وأنا بفكر جدياً أجيب عربية

انتو عارفين طبعا (أو حتى لو مش عارفين مش مشكلة أديكم بتعرفوا) أن أبوظبي بقت زحمة قوي وعلشان الواحد يقدر يحصل تاكسي بقت عملية صعبة والجو حر ما يقدرش يستنى كتير

وبعد تفكير عميق قررت أتعلم السواقة، وبما إني هابدأ من الصفر كان لازم أدخل مدرسة المرور في أبوظبي

ورحت فعلا فتحت ملف في المرور ودفعت حوالي 2500 درهم (حوالي 4000 جنيه مصري) وبدأت التدريب الممل

وبعد خمس شهور وصلت أخيراً لأول اختبار كان مفروض يتعمل في المدرسة قبل ما أخرج أتدرب في الشارع

النهاردة كان ميعاد الامتحان، وفعلاً دخلت وكان الامتحان سهل جدا عبارة عن ازاي تقف بالعربية في الباركن بشكل صحيح

وكانت النتيجة!!

صدمة!!!

أنا سقطت يا مينز!!!

ما استوعبتش اللي حصل..

قولت يمكن دي كدبة إبريل باعتبار النهاردة أول إبريل

ازاي واحد زيي كدة: عبقري، عظيم، ذكي، متميز يسقط!!

يا فضيحتك يا طنط فكيهة!!!!

وبعد ما فقت من الصدمة.. افتكرت البوست الأخير بتاعي اللي عن الايمان بالقضاء والقدر.. قولت الحمد لله

المفروض اني أعيد الامتحان قريب.. بس أنا بفكر بصراحة أجيب عربية كاروا بحمار.. أو توك توك في الأول وبعدين أتدرب على العربية

تذكرت قول الشاعر : لكل عظيم (اللي هو أنا) هفوة.. ولكل جواد كبوة

وكل سقوط وأنا طيب