بما ان النهاردة وبكرة أجازة، فأنا قررت أطبخ زي ما بعمل كل أسبوع
نزليت صليت الظهر واشتريت الأكل اللي هاطبخة ورجعت
وبدأت الماتش بتاع الطبيخ، لكنه المرة دي كان غير طبيعي؟؟
حطيت اللحمة في المية على البوتاجاز ومعاهم بصلة صغيرة ومكعب مرقة دجاج وشوية توابل
وجبت البصل!! وآآآآه من البصل.. وبدأت أقطعه.. أنا أقطع وعنيا بتدمع.. لوما الدموع زادت في عينيا مديت ايدي وانا مش شايف طبعا علشان اجيب المناديل اللي جنبي امسح بيها الدموع دي، رحت خابط الاطباق وجايبها على الأرض؟؟
طاااااااااخ.. طااااااااااااخ.. طاااااااااااااااخ
فيه ايه؟؟؟؟
ببص على الأرض لقيت كل الأطباق اللي كانت جنبي وقعت واتكسرت حتت صغيرة؟؟!!
سيبت البصل ونزلت الم الحاجات المتكسرة دي وبعد ما خلصت رجعت للبصل تاني
وأول ضربة سكين في البصلة كانت جامدة من الغيظ على الاطباق؟؟ السكين قسمت البصلة واخدت حتة من صباعي؟؟؟
عالجت الجرح بشكل بسيط وكملت تقطيع البصل وحطيته على النار
التليفون قاعد يرن يرن، سيبت البصل على النار وخرجت اشوف مين على التليفون وقعدت ارغي لغاية ما شميت ريحة الشياط؟؟؟؟؟؟؟؟؟؟ البصل اتحرق؟؟؟؟؟؟؟؟؟
طيب وبعدين كدة الطبخة باظت؟؟؟؟؟
قولت خلاص اعمل شوية مكرونة وشربة مع اللحمة المسلوقة وبس؟؟ مفيش حل تاني
وجيت قعدت أقلب في المكرونة لغاية ما بدأت تحمر، ومسكت الحلة بتاعة الشربة واللحمة وهي بتغلي علشان احط شوية شربة على المكرونة، بس كان الدخان اللي خارج من الحلة سخن جداااا فلسع ايدي وسبت الحلة ادلقت كلها على البوتاجاز والمكرونة؟؟؟
الحمد لله اني خرجت سليم؟؟؟؟؟
سبت المطبخ وخرجت وقعدت أفكر ؟؟؟ هو فيه ايه؟؟؟؟؟؟؟؟؟؟؟
أكيد عفريت؟؟؟؟ أصل ده مش طبيعي؟؟؟؟؟؟؟؟؟
وفي النهاية غيرت هدومي ولبست ونزلت اتغديت برة؟
وراحت الطبخة كلها بعد ما اتبهدلت أنا والمطبخ؟؟؟
والسبب مجهول؟؟
على فكرة دي مش اول مرة أطبخ فيها.. بالعكس انا بطبخ حلو قوي، بس مش عارف ايه اللي كان بيحصل المرة دي؟؟
ياريت بقى لو حد عنده وصفات أكل سهلة ومفيش فيها بصل يقولي!!!!!!!!
هناك 39 تعليقًا:
ده مش عفريت
دي خيبة وحياتك
انتي مش عارف تطبخ ولا تعمل حاجة فبتقول عفريت..هههههههههههه
نصيحتي ليك
بلاش تطبخ في البيت تاني
المرة دي جت سليمة محدش عارف المرة الجاية ايه يحصل
قولي وانا اطبخلك وابعتلك الاكل بالايميل.. ههههههههه
سماح
نسيت أقولك
أنا ممكن أديك درس خصوصي في الطبيخ بس الحصة 200 جنيه
اه امال ايه هي الخبرة دي بالساهل
هههههههههه
يلا معاك ربنا
بص انا مش قادره ابطل ضحك
استنى لما اضحك شوية
هههههههههههههههههههههههه
فكرتنى بنفسى اول مبدأت اطبخ
معلش هما الرجاله كده
ياما محترفين طبخ ومجننا
ياما مبيعرفوش يطبخوا
وبردو مجننا
مدونتك حلوة
وكلامك احلى
ميرسى على الكومنت الجميل
وسلامتك صباعك
تحياتى
عفريت فى المطبخ
ياشيخ انتو كده لما تكونو خايبين فى حاجة لازم تلاقو شماعة تعلقو عليها خيبتكم هههه
سلامتك ياسيدى بس على فكرة ده مجرد سوء حظ يعنى فى بنات كتير وبيعرفو يطبخو وبرغم كده ممكن يحصل معاهم اللى حصل معا كم
عشان كده اسحب كلمة خايبين
معلش ربنا يقويك ويرجعك لأهلك بالسلامة وتدوق طبيخ ست الحبايب
ياعينى يامسكين ده اكيد حد كان فاقعك دعوه او عين صعبه اوى
ربنا معاك
هههههههههههههه
ده ايه النحس ده
هو احسن حل فعلا انك تاكل بره
ههههههههه
طب اتكلم جد حبه
انا كنت قرأت مرة في كتاب د/ابراهيم الفقي (( قوة التفكير)) عن قانون اسمه التوقع و الانجذاب
بيقول فيه ان اي حاجة بنفكر فيها بترجعلنا من نفس نوعها لو فكرنا اننا منحوسين هنلاقي كل حاجة بتحصلنا بتأكدلنا تفكيرنا ده و لو فكرنا اننا محظوظين بردو هنلاقي كل اللي بيحصلنا بيأكدلنا ده
القانون ده هو قانون موجود بالفعل مش مجرد كلام و بيأكده علماء النفس و استند د/ابراهيم الفقي علا كلامه بحديث الرسول عليه الصلاة و السلام (( تفاءلوا بالخير تجدوه ))
شفت ادينا اهو لقينا العفريت
هو القانون ده
هههههههههههه
معلش طولت عليك
و بجد مدونتك جميلة جدااااااا اول زيارة ليا و ان شاء الله هتابعك باستمرار
تحياتي :))
هههههههههههههههههههههههههههههههه
معلش سلامة صباعك
بص قبل ما تقطع البصل طبعا هتقشره الاول وتغسله وتحطه حوالي ربع ساعة في الفريزر وبعدها قطعه براحتك
ومعلش ملحوظة كمان تحط المية تغلي الاول وبعدها تحط اللحمة والبصل ومعاها شوية فلفل وورققتين لوري وحبيتين تلاتة حبهان وكام قرنفلة دة هيخلي طعمها احلى من شوربة الدجاج لحسن فيها مادة حافظة مضرة جدا جدا مع كتر استخدامها حتى اسال دكتورة هبة قطب
ومعلش لو عاوز شوية نصايح طبيخ وبيت قريب هفتح مدونة لكدة
تحياتي وسلامة صباعك تاني
سماح
انا خايب يعني... ربنا يسامحك
بلاش نمسك للبعض على الواحدة ولا تحبي افكرك بالأكل اللي انتي عملتيه في الرحلة.. بلاش احسن علشان الناس ما تشمتش فيكي.. ههههههههههههه
وبعدين درس ايه اللي انتي جاية تقولي عليه ده، وب 200 جنيه ليه هو انا داخل امتحان الخارجية ولا ايه، انا موافق على الدرس مقبل 75 قرش.. اتفقنا.. هههههههههههه
يا بنتي انا طباخ كحصلتش.. هي بس المرة دي مش عارف ايه اللي حصل فيها، يلا نعمل ايه بقى الله يجازي اللي كان السبب وخلا الناس تشمت فيا؟
وشكرا على تعليقك
ومنوراني طبعا
شيماء الجيزي
الضحك ده شماتة فيا ولا ايه؟؟؟؟
وبعدين الحمد لله اني فكرتك بنفسك، يعني انتي كمان كنتي بتبوظي الدنيا اول ما تطبخي ومش بعيد لغاية دلوقت. ههههههههههههههههه
معلش ما يقع اللا الشاطر اللي هو انا
وميرسي ليكي جدا على التعليق الجميل ده ودايما انشاء الله منوراني
سمراء
مش مصدقة انه عفريت في المطبخ.. تعالي شوفي بنفسك.. ههههههههههه
وبعدين انا خايب يا سمراء ما كانش العشم.. بس انتي عندك حق لانك ما دوقتيش طبيخي.. واللي ما يعرفش يقول عدس.. ههههههههه
لا تسحبي كلمة خايبين ازاء، هي سهلة كدة، انا عايز تعويض، وارفع قضية قدام المحكمة الدستورية العليا أطالب بتعويض كبيييييييييير يعني مثلا 25 قرش
ولا يهمك احنا فعلا خايبين
ومتشكر جدا على دعوتك الجميلة وعلى مرورك وتعليقك الجميل
وانشاء الله تنريني دايما
د/أجدع بنوتة
أنا بقول كدة والله يا ياسمين أكيد فيه عين قوية حسدتني على الطبيخ بتاعي انتي عارفة اني طباخ نمرة واحد..ههههههههههه
بس اوعي تكوني انتي..هههههه
شكرا على مرورك وتعليقك الجميل
إسراء حمدي
أولا شكرا ليكي على تشريفك مدونتي وشكرا كمان مرة على تعليقك الجميل جدا
بالنسبة للنحس فهو فعلا كان ملازمني المرة دي مش عارف ليه، بس الحمد لله انها جت سليمة
واضح انك إنسانة مثقفة ودي حاجة جميلة، وأنا عن نفسي متفق تمام الاتفاق مع قانون التوقع و الانجذاب، لان فعلا الانسان لو حط في دماغه حاجة هيحاول يفسر كل شيء بناء على الفكرة المسبقة دي، مفيش حاجة اسمها نحس او غير، لكن فيه نصيب وقضاء وقدر وده مش مرتبط بحاجة
وبشكرك بجد انك قدرتي تلاقي العفريت من خلال التحليل الجيل جدا جدا ده، وبشكرك كمان مرة على الزيارة والتعليق
ودايما منوراني
nonoymm
الله يسلمك
ما تقلاقيش الاصابة بسيطة والحمد لله
ومتشكر جدا على النصايح القيمة دي وانشاء الله هاعمل بيها
وفي انتظار المدونة الجديدة بس ابقي قوليلي عليها
وشكرا على المرور والتعليق
بقى مش عاحبي اكلي دلوقت؟؟
أمال كنت عمال تذق فيه ليه في الرحلة، ده انت لوحد اكلت نص الاكل اللي كنت جايباه، ودلوقت جاي تقول مش كويس.. فعلا زي القطط تاكل وتنكر..هههههه
وبعدين شوف سبحان الله جاي تمدح في طبيخك الكلمة اتكتب غلط..هههه علشان ربنا عارف انك بتكذب.. قال طباخ كحصلتش..هههههههه اسمها محصلتش يا عبقري زمانك
وانا مش هاتنازل عن 200 جنية في الدرس لو عايزني اعلمك الطبيخ
سلام يا جميل وخلي بالك من صباعك لا يطير كله المرة الجاية.. ههههههه
لا نتكلم جد شوية :D
المشكلة عندك ف سوء التصرف
واللبخه
انا ساعات كده خاصة لو ماما واقفه
جمبي او اى حد ف المطبخ
المفروض انت ترتب كل حاجة قبل الأكل
ممكن لو عندك خلاط تضرب البصله فيه
وتنجز لو مفيش خلاط يبقى قبل ما تبدأ
الأكل خالص تقطع البصل وتجهز المكرونة
مثلا يعنى واللحمة وكل حاجة ف طبق
ويفضل يكون بلاستيك او صاج او اى حاجة
غير قابلة للكسر طبعاً
بحيث انك لما تبدأ العمليه دى يادوب
تحط المكونات كلها فوق بعض من غير ما
تقعد تقطع وتحمر وكل الكلام ده ويتحرق
وترمية وتشترى جاهز
اتمنى اكون افادتك ف حاجة
وخلى بالك المرة الجاية وبالهنا والشفا
مقدما ً :)
انا اقولك السبب فى البهدلة دى جه منين
اصلك حطيت مرقة دجاج مع اللحمة وهى بتتسلق
طبعا الاتنين عملوا قافلة مع بعض عفرتوا الطبخة
جرب المرة الجاية وبلاش تحط مرقة دجاج!!!!!
بالهنا والشفا
ههههههه
سلامتك وسلامة صباعك
ربنا يحفظك
ههههههههههههههههههه
نحمدالله انك طلعت سليم من الليلة ديه
عايز رايى ؟
سندويتشات الجبنة مريحة وسهلة وسريعة
ولا بصل ولا دياولو
ربنا معاك
والله يكون فى عون المطبخ اللى اتشلفط ده
يا دى الخيبه يا دى الجرسه ام حناجل يا دى النيله ام جلاجل فرجت علينا الامارات كلها
يا ربى ما قولنا اقعدوا فى بلدكوا قله وغطاء عليكوا
ولا بكرامتكوا بدل ما تقطعوا صوابعينكم مع البصل طيب اقولك سر واوى تفضحنى عيب صح انا مره عورت ايديى وانا نازله ادلع املى القلل قصدى ببشر البصله هههههخخخخخخخخخ وماما قعدت تضحك عليا بس ربنا يخلى الفيتشن ماشين سهل كل حاجه
المهم اقولك على وصفه حلوة وسريعه
بص هات مكرونه واسلقها
وهات علبه تونه ايون تونه متنحش وبعدين فصين توم وحط التوم على النار ايون فى زيت وبعدين الفصين التوم مش صحيت افرمهم او دقهم وبعدين ملح وكمون ومعلقه صلصه وبعدين صفى التونه وحطها ولو عندك فلفل اخضر قطعه معاه وبعدين سيبه على النار شويه وقلبه وهات المكرونه بعد السلق وحط حته سمنه ومرقه دجاج وقلبها فيها وسيبها خمس دقايق على النار
وكل بقى المكرونه وعليها التونه هتبقى تجنن ولما تجنن اتصل قولى ابعت لك العباسيه هههههههههه بجد جربها انا بعملها
سماح
أنا طبعا ما أقدرش أشكك في أكلك وخاصة المحشي، بس بلاش يعني امة لا إله الا الله تعرف اني اكلت طبيخك. وبعدين بلاش الافترا انا اكلت نص الاكل لوحدي.. حرام عليكي..ههههههههههه
انا علشان خاطرك ممكن اخلي الدرس بجنيه ونص.. يلا عنه ما حد حوش؟؟؟؟؟
ومنوراني بالتأكيييييييد
حمامة
متشكر جدا جدا على النصايح الغالية دي وانشاء الله هحاول أطبقها طبعا.
بس المشكلة مش بس سوء تصرف فيها كمان سوء حظ واضح، أصل ممكن حاجة وحدة تحصل لكن مش كل حاجة لغاية الطبخة كلها ما تبوظ والمطبخ يتبهدل ويكون فيه اصابات وجرحى..هههههههه
الحمد لله على كل حال
وشكرا على النصايح
ودايما منوراني انشاء الله
لي لي
يعني المرقة مع اللحمة عملو قفلة عفرتو الطبخة..ههههههههههههه
هو ده التفسير الصح؟؟؟
إزاء انا احط مرقة فراخ مع اللحمة.. مفروض احط مرقة لحمة مع اللحمة علشان ما تحصلش قفلة..هههههه
مش هاعمل كدة تاني خلاص
والله يسلم سموك
ويارب تنوريني دايما
آية
عندك حق هي سندويشات الجبة واللنشون هي الحل؟؟؟؟؟؟
اما بالنسبة للمطبخ فمش عايز أقولك لو شوفتيه تحسي انه من مخلفات الحرب العالمية التانية.. بس انا ظبطته بعدين.
شكرا على مرورك وتشريفك مدونتي البسيطة ودايما منوراني انشاء الله
آبي
مش كل الامارات اتفرجت هي بس امارة أبوظبي.. والجيران كانوا هيستدعو الماطفي بس الحمد لله.. جت سليمة. ههههههههههههه
وبعدين انتم السابقون برضه يعني مش انا لوحدي اللي اتبهدلت بسبب البصل ههههههه
وبعدين ايه الفيتيشن ماشين ده انا اعرف الكوك ماشين، ومش ناوي اشتريها غير لما اتجوز.. ايه رأيك بقى
ومتشكر جدا على النصيحة الغالية دي وتأكدي اني هاعمل بيها.. بس لو الطبخة باظت يبقى مش انا السبب لا تبقي انتي وهاحملك المسؤولية كاملة عن كل اللي هيحصل.. وربنا يستر هههههههه
ودايما منوراني يا آبي
وأشوفك قريب على الفضائيات يارب
أشتاتا أشتوت .. عفريت
لالالا .. ده بس أخبار مصر ملخبطاك شوية وشاغلة تفكيرك .. اطمن احنا خلاص بقينا كويسين وبناكل عيش كل يوم !!!
ارجع للمطبخ وحط في بطنك بطيخة صيفي
أكتر حاجه بكرهها في حياتي أني اقف في المطبخ
بصراحه كل ما أتزنق واقف أعك في حاجه دايما بتصعب عليا نفسي وبقول فينك يا أمي
تعرف اللي حصلك ده كوميديا عاليه جدا
هههههههههه
خالص تحياتي
على الطريق
طمنتيني يا أميرة ان المصريين بقم خلاص يكلوا عيش..يااااااااااه اخيرا الواحد ارتاح.. عثبال الفول والطعمية..ههههههه
وحمد لله على السلامة بعد الغيبة الطويلة دي
ومنوراني بالتأكيد
الشارد
انا مش بكره المطبخ بس دي اول مرة يحصل فيها كدة
وعامة كلنا في العك سواء..ههههههههه
ومنورني بجد
حابس حابس .... عفريت في المطبخ بس تصدق حظك وحش عارف لو كانت طلعت عفريته كنت تستغلها وتخليها تطبخلك هيه ..... وبعدين تنصرف
وبعدين قولي انت بتطبخ كل اسبوع بس وباقي الاسبوع بتعمل فيه ايه بتصوم ولا طبعا مقضيها ديلفري ... عامة الحمد لله انك مش بتطبخ كل يوم والا كان زمان المطبخ بقى دمار قضيها سندوتشات بقى وبلاش تعمل العملة تاني عشان ترجع سليم لاهلك في مصر
تحياتي وربنا يبعد عنك العفاريت
أيامنا الحلوة
تصدقي عندك حق، هو لو عفريته كنت استغلتها فعلا مش بس في الطبيخ لا والغسيل والكنس والتنضيف وكل حاجة.. بس هنعمل ايه بقى حظ الواحد دكر..ههههههههه
أنا بطبخ بس في الاجازة لكن في الايام العادية بتغدى في بوفيه الشغل (بفلوس طبعا) وبقضيها حاجات خفيفة تيك اواي
متشكر على النصايح الغالية دي
ومنوارني دايما يا شيرين
اولا الف سلامه على صباعك
ثانيا بقى لحمه بتستوى على النار تحط عليها مرقه "دجاج " ليه ؟؟؟؟؟؟؟
قال بعرف يطبخ قال
ثالثا المكرونه مش بتتعمل بالشوربه
لااااااااااااا
كويس بقى ان الاكل اتدلق لنك مش كنت هتلاقى اطباق تحطه فيها عشان تاكل
رابعا بقى
ادى العيش لخبازه
انت مالكش فى الطبيخ
اعترف وسيب حد بيعرف هو اللى ياكلك
يعنى الحسنه الوحيده انك نزلت تاكل بره
كنت هزعل اوى لو نمت من غير غدا
لا حول ولا قوة الا بالله ... :)
والله العظيم صعبت على جدا ..
معلش خيرها فى غيرها ..وبعدين ايش ادراك ان ربنا نجاك من حاجة كانت ممكن تحصل لو كملت طبيخ ...
عامة بعد كده اذكر الله وانت بتطبخ ..وسمى كده ..وان شاء الله خير ..
على فكرة التدوينة رائعة ..انا كنت هموت من الضحك وانا بقراها بجد ..وفى نفس الوقت انت قدرت توصل لنا احساسك جامد جدا..لدرجة انك فعلا صعبت على :)
بجد ما شاء الله عليك
انا موضوع الطبخ ده مليش في خالص
معروف عني في البيت اول ما بدخل المطبخ تلاقي صوات في البيت الحقوا احمد في المطبخ
انا اخري اعمل بيض مسلقوق احطه علي النار وارجع الاقي بيضة في السقف وبيضة علي الارض اصل المية نشفت والبيض فرقع
ابقي اقراء اية الكرسي والمعوذتين قبل ما تدخل المطبخ
العجوز
بندقة
أولا شرفتي المدونة بتعليقك
ثانيا الله يسلمك
ثالثا هو ايه المشكلة لما احط مرقة مع اللحمة.. وليه المكرونة مش بتتعمل بالشوربة؟؟؟؟؟
وبعدين ما تقلاقيش مش كل الاطباق اتكسرت، فيه اطباق كانت موجودة في بعيد لسة سليمة
وانا بقى مصر اني اعرف اطبخ..هههههههه
مقدرش ازعلك وانام من غير غدا.. هههه
منوراني بجد
سمر
متشكر جدا على التعليق الظريف بتاعك ومتشكر كمان على كلامك الحلو عن المدونة، والحمد لله اني قدرت أوصل إحساسي ليكي
والحمد لله انك ضحكتي واتبسطي كمان.. ما هو شر البلية ما يضحك.. هههههههه
ويارب دايما منوراني
أحمد العجوز
هم بيقولوا ان كل الشباب كدة خيبة في المطبخ
بس احنا لازم نثبت العكس.. مش مهم نبوظ الدنيا المهم نتعلم..هههه
شكرا على تشريفك المدونة
لسلام عليكم
:::دعوة :::
يدعوكم فريق مدونة حركات
الى زيارة المدونة الاولى فى خدمات المدونين
:: حركات ::
والتى تختص بالتصميمات
الخاصة بالمدونات
وكذلك التعليم
،،:::،،
نسعد بتشريفكم لنا وانضمامكم معنا
فريق المدونة
www.harakat-86.blogspot.com
السلام عليكم
ليك عندى تاج تعالى خده
بشكركم على المدونة المميزة دمتم بود و اطلعوا على وصفات شهية اخرى معنا
طريقه عمل الارز الاصفر على طريقة تكا
تعرف على زراعة و صناعة الارز
إرسال تعليق